Ibihangange mu mukino w’iteramakofe, Mike Tyson na Floyd Mayweather, byatangajwe ko bigiye guhurira mu mukino w’imurika (exhibition fight) uzabera i Kinshasa muri Repubulika ya Demokarasi ya Congo.
Ikinyamakuru The Ring Magazine cyatangaje ko uyu mukino uzahuza ibi byamamare mu iteramakofe washyizwe ku itariki ya 25 Mata 2026.
Ni umukino w’imurika aho hatazatangwa amanota cyangwa igikombe, kuko uzaba ari uwo kwishimisha gusa.
The Ring Magazine ivuga ko uyu mukino uzaba nyuma y’uko Mayweather yifuzaga kurwana na Manny Pacquiao muri uyu mwaka biciye kuri Netflix, ariko ntibikunde.
Iki kinyamakuru kivuga ko uyu mukino w’i Kinshasa uzaba mu rwego rwo kuzirikana umurage wa ‘Rumble in the Jungle’ nyuma y’imyaka 52 ishize.
“Rumble in the Jungle” ni izina ry’umukino w’iteramakofe wabereye i Kinshasa mu 1974.
Ni umukino wahuje Muhammad Ali na George Foreman, aho Ali yatsinze Foreman mu buryo bwa ‘knockout’ muri round ya 8.
Floyd Mayweather afatwa nk’umwe mu bakinnyi beza b’iteramakofe babayeho mu mateka, aho yatsinze imirwano 50 muri 59 yakinnye.
Ni mu gihe Mike Tyson we yegukanye umudali w’indwanyi idatsindwa mu 1987 na 1990.
Aba bakinnyi bombi basezeye gukina nk’ababigize umwuga, aho Mayweather yasezeye mu 2017, mu gihe Tyson ari mu 2005.
NDEKEZI JOHNSON / UMUSEKE.RW
Kongo!akarere kabereye kuberamo imirwano!!!