UPDATE: Indege y’igisirikare cya America yaguyemo abantu 6

UPDATED 20h06: Abandi bantu babiri bari mu ndege ya America yahanukiye muri Iraq na bo bapfuye nk’uko byemejwe n’ubuyobozi bw’Ingabo za America muri Aziya.

Indege yo mu bwoko bwa KC-135 yahanutse mu ijoro ryo ku wa Kane, America ivuga ko ari impanuka, Iran ikavuga ko yarashwe n’abarwanyi bayishyigikiye bakorera muri Iraq.

Abantu batandatu barimo Polite n’umwingirije n’abandi bari muri iriya ndege itanga amavuta ku ndege z’intambara ziri mu bikorwa bya gisiirkare byiswe Operation Epic Fury, bose bapfuye.

Centcom ivuga ko hagikorwa iperereza ku cyateye impanuka.

Urupfu rw’aba Banyamerika 6 rwiyongereye ku rw’abandi 8 bamaze gupfa kuva intambara yo muri Iran itangiye, gusa umwe America yavuye ko yishwe n’indwara.

Saa 14h11: Abantu bane muri batandatu bari mu ndege itwara amavuta ya America byemejwe ko bapfuye nk’uko ibiro by’ingabo za America muri Aziya, (Central Command, Centcom) bwabyemeje.

Iyi ndege yo mu bwoko bwa KC-135, ikorwa n’uruganda rwa Boeing, ni imwe mu zagiraga uruhare mu guha amavuta indege ziri mu ntambara, ikaba ifite ubushobozi bwo kugaburira amavuta indege iri mu kirere.

Yon a ngenzi yayo ariko yabashije kugwa neza, zari mu kirere cyo muri Iraq ubwo imwe yagwaga.

Amazina y’abapfuye ngo azatangazwa nyuma y’amasaha 24, abo mu miryango yabo babanje kubimenyeshwa.

INKURU YABANJE: Ubuyobozi bw’Ingabo za America muri Aziya buvuga ko indege ifasha mu guha izindi amavuta, (U.S. KC-135 refueling aircraft) yahanukiye mu kirere cyo muri Iran.

Itangazo rigufi rivuga ko iyi ndege yari mu bikorwa bya gisirikare muri Iran (Operation Epic Fury), yahanukiye mu kirere kigenzurwa n’inshuti za America hakaba hatangiye ibikorwa by’ubutabazi.

Ubuyobozi bw’ingabo za America, CENTCOM buvuga ko iriya ndege yahanutse iri mu Burengerazuba bwa Iraq, ariko indi byari kumwe yo yabashije kugwa nta kibazo igize.

Itangazo rivuga ko ihanuka ry’iriya ndege ritaturutse ku ntwaro z’umwanzi cyangwa kwibeshya kw’inshuti za America.

CENTCOM ivuga ko amakuru arambuye aza gukusanywa agatangwa kugira ngo imiryango y’abari muri iriya ndege ibone amakuru yuzuye.

Ku ruhande rwa Iran, televiziyo y’igihugu yatangaje ko iriya ndege ya America yarashwe  misile n’umutwe w’abarwanyi bakorera muri Iraq kandi abantu bose bari bayirimo bapfuye.

Izi ndege zitwara amavuta, U.S. Air Force KC-135 Stratotanker imwe yagurwaga miliyoni 39.6 z’amadolari mu 1998.

Muri iki gihe habazwe agaciro k’idolari aho kageze, indege imwe ya buriya bwoko igura miliyoni 79.6 z’amadolari.

Televiziyo yo muri America, CNN ivuga ko iriya ndege yarimo abantu 5 nk’uko umwe mu bayobozi yayibibwiye.

UMUSEKE.RW