CAF yatangaje urutonde rw’abazavamo abitwaye neza 2025

Impuzamashyirahamwe y’Umupira w’Amaguru ku Mugabane wa Afurika, CAF, ryashyize hanze urutonde rw’abakinnyi n’abatoza bazavamo abazahabwa ibihembo by’abitwaye neza mu 2025.

Kuri uyu wa Gatatu, tariki ya 22 Ukwakira 2025, ni bwo CAF yashyize hanze abahataniye ibihembo by’abitwaye neza muri uyu mwaka. Hazahembwa umukinnyi mwiza w’umwaka, umukinnyi witwaye neza mu mikino Nyafurika ya CAF Champions League na CAF Confederation Cup, umunyezamu mwiza, umukinnyi muto wahize abandi, umutoza mwiza, ikipe y’umwaka n’ikipe y’igihugu y’umwaka.

Mu cyiciro kizavamo umunya-Afurika mwiza wa 2025, harimo Fiston Kalala Mayele ukinira Pyramids FC yo mu Misiri, Frank Anguissa ukinira Napoli yo mu Butaliyani, Mohamed Salah wa Liverpool, Denis Buanga wa Los Angeles FC yo muri Leta Zunze Ubumwe za Amerika, Victor Osimhen ukinira Galatasalay yo muri Turquie.

Hari kandi Ossama Lamlioui wa RS Berkane yo muri Maroc, Achraf Hakimi wa PSG yo mu Bufaransa, Serhou Guirassy wa Borrusia Dortmund yo mu Budage, Iliman Ndiaye wa Everton yo mu Bwongereza na Pape Matar Sarr wa Tottenham Hotspur yo mu Bwongereza.

Mu cyiciro cy’abazavamo umunyezamu wahize abandi, harimo Aymen Dahmen wa CS Sfaxien yo muri Tunisie, Ronwen Williams wa Mamelodi Sundowns FC yo muri Afurika y’Epfo, Marc Diouf ukinira TP Mazembe yo muri DRC, Édouard Mendy wa Al-Ahli yo muri Arabie Saoudité, Stanley Nwabali ukinira Chippa United yo muri Afurika y’Epfo.

Hari kandi, Yassine Bounou wa Al Hilal yo muri Arabie Saoudité, André Onana wa Manchester United ariko watijwe muri Trabzonspor yo muri Turquie, Vozinha ukinira Chaves yo muri Portugal, Ahmed El Shenawy wa Pyramids FC yo mu Misiri na Mounir Mohamed wa RS Berkane yo muri Maroc.

Abato bavamo uwitwaye neza kurusha abandi, barimo Tylon Smith wa Queens Park Rangers FC yo mu Bwongereza, Mbekezile Mbokazi ukinira Orlando Pirates yo muri Afurika y’Epfo, Momoh Kamara ukinira Minnesota United yo muri Leta Zunze Ubumwe za Amerika, Daniel Bameyi wa Yum Yum FC yo muri Nigeria, Othmane Maamma wa Watford yo mu Bwongereza.

Abandi bato barimo Houssam Essadak ukinira Union Touarga  yo muri Maroc, Abdellah Ouazane wa Ajax yo mu Buholande, Noah Sadiki ukinira Sunderlande yo mu Bwongereza, Alynho Haidara wa FC Mainz 05 de Jacqueville yo mu Budage na Ashraf Tapsoba wa Réal du Faso yo muri Burkina Faso.

Uretse ibi byiciro bizavamo abakomoka ku Mugabane wa Afurika bitwaye neza kurusha abandi, n’abakobwa bazatoranywamo abahize abandi, abatoza bazavamo umwe wagize ibihe byiza, ikipe y’umwaka na yo izahembwa, ikipe y’Igihugu nziza muri Afurika, na yo izahembwa ndetse n’uwitwaye neza mu mikino Nyafurika ya CAF Champions League na CAF Confederation Cup, azahembwa.

Abatoranyijwe, ni abitwaye neza guhera tariki ya 6 Mutarama kugeza tariki ya 15 Ukwakira uyu mwaka. Buri cyiciro kirimo abantu 10 bazavamo batatu ba mbere.

UMUSEKE.RW