Biciye kuri X ya yo, Yanga SC yo muri Tanzania, yemeje ko yaguze umunya-Uganda, Allan Okello wakiniraga Vipers SC y’iwabo n’ikipe y’Igihugu ya Uganda Cranes.
Inkuru yemeza isinya rya Okello wari usigaje amezi atandatu ngo asoze amasezerano ye, yemejwe ndetse ishimangirwa na Yanga Africans yabicishije ku mbuga nkoranyambaga za yo zirimo X.
Bivugwa ko uyu munya-Uganda uri mu beza bakina muri aka Karere, yatanzweho ibihumbi 500$, we ahabwa ibihumbi 100$ mu gihe andi ibihumbi 400$ yagiye mu kipe avuyemo.
Ibinyujije ku rukuta rwa yo rwa X, Vipers SC yashimiye Allan Okello wari umaze imyaka ibiri n’igice. Ni umusore wayihaye byose birimo igikombe cya Shampiyona, icy’Igihugu n’ibindi.
Uyu musore w’imyaka 25, yasinye amasezerano y’imyaka ibiri n’igice muri iyi kipe ikunzwe na benshi muri Tanzania. Bivugwa ko azajya ahembwa ibihumbi 15$ buri kwezi.
Abandi banya-Uganda baciye muri Yanga Africans, barimo Emmanuel Okwi, Steven Bengo, Hamiss Diego Kiiza na Khalid Aucho.
Mu gihe yari amaze muri Vipers SC, yayitsindiye ibitego 24 anatanga imipira 13 yavuyemo ibindi mu mikino 58 yayikiniye muri Shampiyona ya Uganda.
Mu irushanwa ry’Igikombe cy’Igihugu, Okello yatsinze ibitego bine ndetse atanga imipira ibiri yavuyemo ibindi bitego.
Andi makipe yaciyemo, ni KCCA FC y’iwabo na Paradou AC yo muri Algérie atatinzemo.
