Rusizi: Ubusinzi bukabije n’ubujura ngo niyo ntandaro y’amakimbirane no kwamburana ubuzima bivugwa mu murenge wa Nkungu.
Hari bamwe mu baturage bo mu murenge wa Nkungu bavuga ko badashimishijwe no kuba umurenge wabo ariwo ukunze kugaragaramo amakimbirane yo mu miryango avamo kwamburana ubuzima, ndetse n’ubujura bushukana.
Bavuga ko amakimbirane anavuze ku kuba ahanini ibi bikorwa bibi biterwa n’ubusinzi bwa bamwe muri bo.
Si ubwambere mu murenge wa Nkungu havugwa amakimbirane yo mu ngo rimwe na rimwe akageza no kwamburana ubuzima ku bashakanye.
Mu kwezi gushize humvikanye umubyeyi w’umugore wasanzwe mu gikoni yapfuye, bamwe mu baturage bo muri uyu murenge bavuga ko batewe impungege n’amakimbirane yo mu ngo akunze kugaragara mu miryango, hakaba n’avamo kwamburana ubuzima ku bashakanye, ahanini bavuga ko aterwa n’ubusinzi bwa bamwe muri bo.
Mukandahinyurwa Jeanette, ni umuturage utuye mu mudugudu wa Rwamaraba, akagari ka Mataba, Umurenge wa Nkungu, yavuze ko batewe impungenge n’ubujura bushukana, n’amakimbirane yo mu miryango avamo kwamburana ubuzima.
Ati “Mu murenge wacu hari abahera mu gitondo banywa inzoga, bagataha mu gicuku uwazinyoye ntiyabura gukora amahano, dutewe impungenge n’uko bituma abashakanye bagirana amakimbirane bakanamburana ubuzima.”
Imananiyisubiza Eraste yavukiye mu kagari ka Mataba, mu murenge wa Nkungu ni naho atuye, ati “Tubona bikaze ntabwo tubishyigikiye, ubujura bushukana n’amakimbirane mu ngo arahari, atera abashakanye kwicana. Byose biterwa n’uko hari abaturuka mu gitondo banywa inzoga bagacyurwa n’ijoro.”
Aba baturage bakomeza bavuga ko amakuru bayatangira ku gihe, ufatiwe muri ayo makimbirane n’ubujura, inzego z’ubuyobozi zamujyana ntatindeyo, akagaruka mu muryango adahindtutse.
Icyifuzo cy’aba baturage, basaba ubuyobozi ko uwajya afatwa yateje amakimbirane n’ubujura yajya ahanwa by’intangarugero, bityo ngo byagabanya ibi bikorwa bigayitse bivugwa mu murenge wabo.
Ku wa Gatandatu tariki ya 31 Mutarama 2026, ubwo hakorwaga umuganda usoza ukwezi, ubuyobozi bw’akarere ka Rusizi, bwihanganishije umuryango uherutse kubura umuntu, bubizeza ubutabera.
Ubuyobozi buvuga ko uwambuye undi ubuzima ntaho azacikira ubuyobozi, busaba abaturage muri rusange kubana neza no gucika ku businzi n’ubujura.
Habimana Alphred ni Umuyobozi w’akarere ka Rusizi wungirije ushinzwe ubukungu, ati “Twihanganishije abaturage ba Nkungu, mwumvise amahano yaguye ejo bundi aho umugabo yishe umugore, byaratubabaje. Ayo makimbirane ageza ku rupfu, icyo nabasaba ufitanye ikibazo na mugenzi we agikemure atamennye amaraso y’umuntu.”
Ikibazo cy’amakimbirane mu miryango giterwa n’urusobe rw’ibibazo birimo ubusinzi mu miryango.
Ku wa 20 Ukwakira 2025 mu mudugudu wa Muhora, Akagari ka Mataba Umurenge wa Nkungu, ku isaha ya saa kumi n’imwe z’umugoroba (17h00) nibwo umugabo yangije inzu ya nyirabukwe kubera amakimbirane yari afitanye n’umugore we.
Mu mwaka ushize wa 2025, ikusanyamakuru riheruka gukorwa muri aka karere ka Rusizi, ryagaragaje ko imiryango 952 ibanye mu makimbirane aturuka ku bintu bitandukanye birimo kutumva neza ihame ry’uburinganire n’ubwuzuzanye mu muryango, kutumvikana ku mikoreshereze y’umutungo, ubusinzi mu muryango, ubuharike n’ubushoreke.
MUHIRE Donatien
UMUSEKE.RW/ i RUSIZI
