Mu irushanwa ry’Igikombe cy’Intwari muri Volleyball y’Abafite Ubumuga mu Bagabo n’Abagore [Sitting Volleyball], ikipe yari ihagarariye Akarere ka Nyarugenge mu Bagore n’iyari ihagarariye aka Musanze mu Bagabo, ni zo zahize izindi.
Ku wa Gatandatu no ku Cyumweru, tariki ya 7-8 Gashyantare 2026 muri Gymnasé iherereye i Remera kuri Petit Stade, habereye imikino y’Abafite Ubumuga y’irushanwa ry’Igikombe cy’Intwari 2026.
Irushanwa ry’uyu mwaka, rifite Insanganyamatsiko igira iti ‘Ubutwari n’Ubumwe bw’Abanyarwanda, Inkingi z’Iterambere.’
Imikino yabaye muri iki gice cy’Abafite Ubumuga, ni Goalball ikinwa n’abafite Ubumuga bwo kutabona mu Bagabo n’Abagore na Sitting Volleyball ikinwa n’abafite Ubumuga bw’ingingo.
Mu cyiciro cy’abagore muri Sitting Volleyball, Nyarugenge ni yo yabaye iya mbere itsinze imikino ibiri ya Musanze amaseti 2-1 na Bugesera amaseti 2-1. Yakurikiwe na Musanze yatsinze Bugesera amaseti 2-1.
Mu cyiciro cy’abagabo muri uyu mukino, Musanze ni yo yegukanye igikombe nyuma yo gutsinda Gisagara amaseti 3-0 ku mukino wa nyuma. Gisagara yabaye iya kabiri, Gasabo ifata umwanya wa gatatu mu gihe Rwamagana yafashe umwanya wa kane.
Perezida wa Komite y’Imikino y’Abafite Ubumuga mu Rwanda [NPC], Bizimana Dominique warwanye intambara yo kubohora Igihugu, yavuze ko n’ubwo yagize ubumuga ariko bidasobanuye gushyira amaboko mu mufuka.
Ati “Nk’umuntu ufite ubumuga nakuye mu gihe cy’intambara yo kubohora Igihugu, nacitse ukuguru ariko sinacitse integer, sinicara ngo mvuge nti ‘ubuzima bwanjye burarangiye’.”
Yongeyeho ati “Narahagurutse, ntangira gukina imikino. Twashinze Ishyirahamwe ry’Imikino y’Abafite ubumuga. Umunsi Mukuru w’Intwari, abantu bafite ubumuga uratureba kandi turashoboye. Nta bwo twagiye mu mihanda gusabiriza abahisi n’abagenzi, ahubwo abantu bafite ubumuga baraza bagakina imikino, bakishima kandi bakanezerwa.”
Mu mikino ya Goalball mu gice cy’abagabo, hari hitabiriye amakipe atanu arimo Rubavu, Rwamagana, Ngororero, Gisagara na Musanze.
Gisagara yari ihagarariye Akarere ka Gisagara, ni yo yegukanye igikombe nyuma yo gutsinda Rwamagana ibitego 7-6 ku mukino wa nyuma. Rwamagana yabaye iya kabiri, Musanze yafashe umwanya wa gatatu mu gihe Ngororero yabaye iya kane.
Mu cyiciro cy’abagore muri Goalball, Ngororero yegukanye igikombe nyuma yo gutsinda Musanze ibitego 10-8 ku mukino wa nyuma. Musanze yabaye iya kabiri, Rubavu iba iya gatatu mu gihe Rwamagana yabaye iya kane.
Muri uyu mwaka, u Rwanda rwizihizaga Intwari ku nshuro ya 32. Muri Sitting Volleyball mu bagabo hari hitabiriye amakipe ane arimo Gasabo, Gisagara, Rwamagana na Musanze. Mu bagore, hari hitabiriye amakipe atatu arimo Nyarugenge, Musanze na Bugesera.
