Ubuyobozi bw’Akarere ka Ruhango bwujuje ibiraro bibiri bibahuza n’Akarere ka Muhanga n’Aka Kamonyi byatwaye arenga asaga miliyoni 150 y’u Rwanda.
Ubuyobozi bw’Akarere ka Ruhango buvuga ko ikiraro cya mbere cyubatse mu Murenge wa Mbuye ho muri aka Karere kibahuza n’Umurenge wa Nyarubaka mu Karere ka Kamonyi.
Ubuyobozi bukavuga ko cyuzuye gitwaye 452,130,112 y’u Rwanda.
Ikiraro cya kabiri cyubatswe mu Murenge wa Byimana kikawahuza n’Umurenge wa Nyamabuye mu Karere ka Muhanga cyubatswe ku bufatanye bw’Akarere na Rwanda TVT Board, cyo cyubatswe gitwaye miliyoni 80Frw.
Umunyamabanga Nshingwabikorwa w’Akarere ka Ruhango Mbabazi Muhoza Louis yabwiye UMUSEKE ko ibi biraro byombi byari byangijwe n’ibiza mu myaka ishize.
Ati: ”Dufite gahunda yo gusana ibindi biraro byangijwe n’ibiza mu Mirenge itandukanye igize Akarere.”
Gitifu Mbabazi avuga ko hari ibisaba Ingengo y’Imali itubutse ibindi bigasaba imiganda y’abaturage.
Rudasingwa Wellars umwe mu baturage bo mu Murenge wa Mbuye avuga ko iki kiraro kibahuza na Nyarubaka cyangijwe n’ibiza cyari cyarahagaritse ubuhahirane n’ubucuruzi bw’imicanga kuko imyumbati n’Umucanga bakunze kubikura muri uyu Murenge wa Mbuye, Kinazi, ndetse n’uwa Ntongwe.
Ati: ”Kuva iki kiraro cyongeye kuba Nyabagendwa bigiye koroshya ubuhahirane hagati y’abatuye utu Turere twombi.”
Gusa avuga ko hakiri ibindi biraro n’amateme muri ibi bice bikenewe kongera kubakwa kuko mu bihe by’imvura nyinshi usanga imigezi yuzuye abaturage bakabura aho baca.
Gitifu Mbabazi avuga ko mu Karere kose hari ibiraro 50 bateganya kubaka, ibindi muri byo bigasanwa hakurikijwe uko buri kiraro cyagiye cyangirika.
MUHIZI ELISÉE
UMUSEKE.RW/Ruhango.
