Ruhago y’Abagore y’u Rwanda irasaba Ubutabera mu basifuzi

Ababarizwa mu makipe akina Shampiyona y’u Rwanda y’Abagore y’Umupira w’Amaguru, barasaba inzego bireba ko abasifura mu Cyiciro cya Mbere baba bari ku rwego rw’iyi Shampiyona.

Uko iminsi ishira, ni ko ruhago y’Abagore y’u Rwanda igenda izamura urwego ndetse abayobora amakipe akina Shampiyona z’Abagore yaba mu Cyiciro cya Mbere n’icya Kabiri, bakomeza kwishimira aho igeze.

Gusa n’ubwo bimeze gutyo, imisifurire muri Shampiyona z’Abagore, ntivugwaho rumwe, ndetse igiteye impungenge ni uko bikomeza gukura uko iminsi ishira.

Bamwe mu bayobozi b’amakipe yo mu Cyiciro cya Mbere, barataka ko imikino ya bo ihabwa abasifuzi bakora amakosa yisubiramo mu mikino itandukanye. Aba bavuga ko bamwe mu baza gusifura iyi Shampiyona, baba batari ku rwego rwa yo.

Abaganiriye na UMUSEKE, barasaba ko Shampiyona z’Abagore na zo zajya zihabwa abasifuzi bari ku rwego rwiza kugira ngo bayifashe kuzamuka.

Umwe ati “Ese kuki mu Bagore ari ho baba bumva bakohereza abasifuzi bakiri abiga?”

Undi ati “Kenshi muri Shampiyona yacu ni ho bohereza abasifuzi baba bari kuzamuka. Kuki twe bataduha abasifuzi beza?”

Undi ati “Niba bifuza gufasha Shampiyona yacu ngo izamuke, bajye bakora mu mpade zose harimo no kuduha abasifuzi beza batica imikino.”

N’ubwo aba bavuga ibi ariko, ntibisobanura ko buri mukino wa Shampiyona y’Abagore, ubonekamo ibibazo n’ubwo hari abacamanza [abasifuzi] batitwara neza ku mikino imwe n’imwe.

Shampiyona y’Icyiciro cya Mbere mu Bagore, igeze ku munsi wa yo wa 10. Umwe mu mikino ihanzwe amaso mu mpera z’iki Cyumweru, ni uzahuza Rayon Sports WFC na Indahangarwa WFC uzabera mu Nzove ejo Saa Cyenda z’amanywa.

Police WFC ni yo ikiyoboye urutonde rwa Shampiyona by’agateganyo n’amanota 23 aho ikurikirwa na Rayon Sports WFC n’amanota 20 mu gihe amakipe abiri ya nyuma ari AS Kigali WFC ifite amanota atatu na Nyagatare WFC ya nyuma n’ubusa b’amanota.

UMUSEKE.RW