Mbere y’uko zihura mu mukino wo kwishyura wa Shampiyona, Rayon Sports WFC na Police WFC zigiye kubanza guhurira mu mukino wo kwizihiza umunsi mpuzamahanga w’umugore.
Ku wa 8 Werurwe 2026, ni Umunsi Mpuzamahanga w’Umugore. Uyu munsi ngarukamwaka, uyu mwaka mu gice cy’umupira w’abagore, uzizihirizwa mu Karere ka Musanze.
Mu butumwa Police WFC na Rayon Sports WFC zohererejwe n’Ishyirahamwe ry’Umupira w’Amaguru mu Rwanda, FERWAFA, yamenyeshejwe ko umukino w’umunsi wa 19 wa Shampiyona wagombaga kuzayahuza mu mpera z’iki cyumweru, wakuweho.
Amakipe yombi yamenyeshejwe ko uyu mukino wasubitswe kubera ko yombi agomba kuzakina uwa gicuti mu kwizihiza Umunsi Mpuzamahanga w’Umugore, uzabera kuri Stade Ubworoherane ku wa 8 Werurwe uyu mwaka.
Ikipe yo mu Nzove n’iy’Abashinzwe Umutekano, ni zo ziyoboye urutonde rwa Shampiyona y’Abagore n’amanota 45 zigatandukanywa n’ibitego zizigamye.
Igikombe cy’umwaka ushize muri iri rushanwa, kibitswe na Rayon Sports WFC nyuma yo kucyegukana itsinze Indahangarwa WFC yo mu Karere ka Kayonza.
UMUSEKE.RW
