Ikipe ya NK Veres Rivne FC yo muri Ukraine ikinamo Umunyarwanda, Niyo David, yatangaje ko uyu musore yahamagawe mu ikipe y’Igihugu, Amavubi yitegura imikino ya FIFA Series izabera mu Rwanda guhera ku wa 26-30 Werurwe 2026.
N’ubwo inzego bireba zitaratangaza umutoza mukuru w’Amavubi, abakinnyi bazakina irushanwa rya FIFA Series bo bakomeje guhamagarwa na Eric Nshimiyimana uhari nk’uw’agateganyo.
Niyo David ukinira NK Veres Rivne FC yo muri Ukraine, yamaze guhamagarwa mu bazifashishwa muri iyi mikino izabera i Kigali.
Ni amakuru yemejwe n’iyi kipe yabicishije ku mbuga nkoranyambaga zayo.
Undi mukinnyi wamenyekanye wamaze guhamagarwa, ni kapiteni w’ikipe y’Igihugu, Bizimana Djihadi ukinira CS Constantine yo mu Cyiciro cya Mbere muri Algérie.
Iyi kipe yemeje ko uyu Munyarwanda uherutse kuyisinyira amasezerano y’umwaka n’igice, yamaze guhamagarwa mu Amavubi.
Harabura iminsi 14 ngo u Rwanda irushanwa rya FIFA Series 2026. U Rwanda ruri mu itsinda rya A na Kenya, Estonie na Grenada. Iri tsinda rizakinira kuri Stade Amahoro guhera kuri 27 Werurwe 2026.
Itsinda rya B ririmo Macau izatangira ikina na Aruba mu gihe Tanzania izatangira ikina na Liechtenstein. Iri tsinda ryo rizakinira kuri Kigali Pelé Stadium guhera tariki ya 26 Werurwe uyu mwaka.
Kugura itike yo kureba iyi mikino, bisaba guca kuri *939*3*2# ubundi ugakurikiza amabwiriza. Itike ya make ni 1000 Frw kuri Kigali Pelé Stadium mu gihe kuri Stade Amahoro iya make ari 2000 Frw.
UMUSEKE.RW
