Akanama Gashinzwe Umutekano ka Loni katoye umwanzuro wo kongerera manda ingabo z’Umuryango w’Abibumbye zishinzwe kugarura Amahoro muri Repubulika Iharanira Demukarasi ya Congo (MONUSCO), aho biteganyijwe ko inshingano zayo zizarangira ku wa 20 Ukuboza 2026.
Ni mu itora ryabaye ku wa Gatanu tariki ya 19 Ukuboza 2025, ku cyicaro cy’Umuryango w’Abibumbye i New York muri Leta zunze Ubumwe za Amerika.
Umwanzuro w’Akanama ka Loni ‘2808 (2025)’, uvuga ko MONUSCO izagumana abasirikare 11.500 n’abandi barimo indorerezi za gisirikare 600, abapolisi 1270 basanzwe ndetse n’abandi 443 bo mu mutwe wihariye.
Inshingano z’ibanze za MONUSCO zizaba ari ugutanga umusanzu mu kurinda abaturage b’abasivili, kwambura intwaro abo mu mitwe yitwaje intwaro no kubasibuza mu buzima busanzwe no gufasha mu kuvugurura urwego rw’umutekano.
Izi ngabo zongerewe manda yo kuguma mu Burasirazuba bwa Repubulika Iharanira Demokarasi ya Congo mu gihe ubutegetsi bw’iki Gihugu bwagiye bugaragaza ko butagishaka izi Ngabo.
Abaturage bagiye bitabira imyigaragambyo yo kwamagana izi ngabo ndetse bakanatera ibirindiro byazo bagatwika.
Ubutumwa bw’Umuryango w’Abibumbye bwo kugarura amahoro n’umutekano muri RDC bwatangiye ku wa 30 Ugushyingo 1999, hashyirwaho umutwe w’ingabo ziswe MONUC zagombaga guhashya imitwe yitwaje intwaro iri mu mashyamba y’icyo gihugu. Ku wa 1 Kamena 2010, uwo mutwe wahinduriwe izina witwa MONUSCO.
Ubwo butumwa bwagiye bwongererwa umwaka nubwo umusaruro wabwo wagiye ugawa, ‘bivugwa ko ubwo ingabo zibugize zakandagiraga muri Congo hari imitwe yitwaje intwaro itanu none ubu ikaba irenga 200’, kandi bwarakoresheje miliyari z’amadolari ya Amerika.
Mu mwaka w’ingengo y’imari wa 2024/2025, MONUSCO yakoresheje miliyoni 918,4 z’Amadolari ya Amerika. Hagabanyutseho miliyoni 145,8 z’Amadolari nyuma y’aho ingabo zayo zivuye mu Ntara ya Kivu y’Amajyepfo mu ntangiriro za 2024.
MUGIRANEZA THIERRY/ UMUSEKE.RW