Ubuyobozi bwa Kiyovu Sports, bwatangaje ko itike ya make yo kureba umukino uzayihuza na APR FC mu mpera zo muri iki cyumweru, ari 3,000 Frw mu gihe ku munsi w’umukino ibiciro bizaba byahindutse.
Ku wa Gatandatu, tariki ya 25 Ukwakira 2025 Saa Cyenda z’amanywa kuri Kigali Pelé Stadium, hateganyijwe umukino w’umunsi wa Gatanu wa shampiyona, uzahuza Kiyovu Sports na APR FC.
Urucaca ruzakira uyu mukino, rwashyize hanze ibiciro by’amatike ku bakunzi b’amakipe yombi n’aba ruhago muri rusange bifuza kuzaza kuwureba.
Guhera mbere y’itariki umukino uzaberaho, ibiciro bizaba bikiri hasi. Ahasigaye hose hadatwikiriye, ni 3,000 Frw, ahatwikiriye ni 5,000 Frw, mu cyubahiro ni ibihumbi 10 Frw mu gihe mu cyubahiro cy’ikirenga [V.VIP] hagizwe ibihumbi 20 Frw.
Ku munsi w’umukino, kwinjira bizaba ari 5,000 Frw adatwikiriye, ibihumbi 10 Frw ahatwikiriye, ibihumbi 20 Frw mu cyubahiro n’ibihumbi 30 Frw muri V.VIP.
Iyi kipe yo ku Mumena izakira umukino, ifite amanota atanu mu mikino ine imaze gukina. Yatsinzwe umukino umwe wa Rayon Sports, itsinda AS Muhanga mu gihe yanganyije na Mukura VS 0-0 na Musanz FC 0-0.
UMUSEKE.RW