Ibitero bya Iran byo mu ijoro ryo ku wa Gatandatu rishyira ku Cyumweru, byasize byangije byinshi ndetse bikomeretsa abantu 180 nk’uko al Jazeera ibitangaza.
Kimwe mu binyamakuru byo muri Israel, The Jerusalem Post kivuga ko Iran yakoresheje ibisasu biturika bikabyara ibindi (cluster munition) bigwa mu gihugu hagati.
Ibi bitero bya Iran birakurikira intambara America na Israel byayitangijeho kuva tariki 28 Gashyantare, 2026, mu gitero Israel yise “Operation Roaring Lion”.
Mu bitero Iran yagabye kuri Israel mu ijoro ryo ku wa Gatandatu byakomerekeje abantu 84 mu gace ka Arad.
Abantu 10 mu bakomeretse ni mu buryo bukomeye nk’uko urwego rushinzwe ubutabazi Magen David Adom rwabivuze.
Uretse bariya 10, abandi bantu 19 bakomeretse biringaniye mu gihe abantu 55 bakomeretse byoroheje.
Israel byabaye ngombwa ko ikoresha indege za kajugujugu mu kugeza kwa muganga abakomeretse, ndetse urwego Magen David Adom, MDA rwavuze ko nta bandi bantu bakiri munsi y’ibinonko.
Kuri iki cyumweru kandi, igitero cya roketi “rocket” cy’umutwe wa Hezbollah ku modoka cyahitanye umuntu umwe mu Majyaruguru ya Israel.
Ibindi bitero bya misile za Iran byagabwe kuri iki Cyumweru, Israel ivuga ko byakomerekeje abandi bantu 15.
Iran yishimiye ko itahushije intego
Televiziyo yo muri Qatar, al Jazeera ivuga ko nibura abantu 180 ari bo bakomerekeye mu bitero bibiri bya Iran ku mijyi ya Israel ya Dimona na Arad, imibare ikayikesha Minisitiri y’Ubuzima ya Israel.
Minisiteri y’Ububanyi n’Amahanga ya Israel ivuga ko igitero cya Iran ku mijyi ya Arad na Dimona cyakozwe nkana kigambiriye abasivile.
Iyi minisiteri yavuze ko abarenga 100 bakomeretse barimo n’abana, ikemeza ko ari icyaha cy’intambara. Ndetse ari iterabwoba.
Benjamin Netanyahu, Minisitiri w’Intebe wa Israel yavuze ko bagiye kongera imbaraga mu bwirinzi bw’ikirere nyuma ya kiriya gitero.
Yavuze ko yaganiriye n’Umuyobozi w’umujyi wa Arad nyuma ya kiriya gitero nyuma y’icyo yise “ijoro rikomeye cyane” kuri uwo mujyi.
Netanyahu yasabye abaturage gukurikiza inama bagirwa n’abashinzwe umutekano. Ati “Twiyemeje gukomeza kurasa umwanzi mu mpande zose.”
Igisirikare cya Iran kivuga ko nyuma y’ibyumweru bitatu intambara imaze ubutasi bwagaragaje intege nke z’ubwirinzi bwayo ku bisasu binyaruka kurusha umuvuduko w’ijwi bizwi nka “ballistic missile”.
Perezida w’Inteko Nshingamategeko ya Iran, Mohammad Bagheri Ghalibaf nyuma ya kiriya gitero yavuze ko “bisa naho igihe cyagez engo intambara yinjire mu kindi gice, ku ngamba zateguwe mbere” mu guhangana na Israel na America.
Ati “Niba Israel itabasha gufata missiles mu gace karinzwe cyane ka Dimona, ni ikimenyetso ko mu bya gisirikare twinjiye mu cyiciro kindi cy’intambara. Ikirere cya Israel nta bwirinzi gifite.”
Domina ni agace bivugwa ko Israel ifitemo intwaro kirimbuzi, amakuru avuga ko Iran ari zo ishaka kurasaho.
UMUSEKE.RW
