Abantu 39 nibo bamaze kumenyekana ko baguye mu mpanuka ya za gariyamoshi ebyiri zagonganiye mu Majyepfo ya Espagne.
Iyi mpanuka yabaye ku Cyumweru tariki ya 18 Mutarama 2026, mu masaha y’umugoroba ku isaha ngengamasaha ya GMT, ubwo gariyamoshi imwe yari itwaye abantu 300 iva mu Mujyi wa Malaga ijya mu mujyi wa Madrid yagonganaga n’indi yavaga i Madrid ijya i Huelva irimo abantu 200.
Minisitiri w’ubwikorezi muri Espagne, Oscar Puente, yabwiye abanyamakuru ko ari ibihe biteye ubwoba babonye ko kandi bataramenya icyaba cyatumye izo gariyamoshi zigongana.
Uretse abantu 39 bapfuye, iyi mpanuka yakomerekeyemo abagera ku 120.
Minisitiri w’Intebe wa Espgane,Pedro Sanchez, yanditse kuri X ko ‘baraye mu ijoro ry’uburibwe.’
Ati “Ndashaka kwihanganisha imiryango y’ababuze ababo. Nta magambo yasobanura uko mwiyumva ariko ndabamenyesha ko Igihugu cyose kiri kumwe namwe.”
Ingendo nyinshi za gariyamoshi hagati y’Umujyi wa Madrid n’ibindi bice zasubitswe kuri uyu wa Mbere.
MUGIRANEZA Thierry/ UMUSEKE.RW