Ishyirahamwe ry’Umupira w’Amaguru mu Rwanda, FERWAFA, ryatangaje ibiciro byo kuzareba imikino y’irushanwa rya ‘FIFA Series’ rizabera mu Rwanda guhera ku wa 26 Werurwe uyu mwaka.
Ni ibiciro byashyizwe hanze ku wa 2 Werurwe 2026. FERWAFA yatangaje ko kureba imikino izabera muri Stade Amahoro, bizasaba kwishyura 2,000 Frw, 5,000 Frw na 30,000 Frw mu myanya y’icyubahiro.
Kuri Stade Amahoro, hazaba hakinira itsinda A ririmo u Rwanda, Kenya, Estonia na Grenada. Imikino yo muri iri tsinda yo izatangira ku wa 27 Werurwe uyu mwaka.
Kureba imikino izabera kuri Kigali Pelé Stadium, bizasaba kwishyura 2,000 Frw na 20,000 Frw mu myanya y’icyubahiro.
Kuri iyi Stade hazakinira itsinda rya B ririmo Tanzania, Aruba, Macau na Liechtenstein. Imikino yo muri iri tsinda izaba tariki ya 26 Werurwe 2026. Kugura itike bisaba guca kuri *939*3*2#.
FIFA Series ni imikino imeze ite?
Ni imikino Mpuzamahanga ya gicuti itegurwa n’Ishyirahamwe ry’Umupira w’Amaguru ku Isi, FIFA.
Ihuza Ibihugu biba bivuye ku Mugabane w’i Burayi cyangwa ku Mugabane wa Amerika n’ibiba byavuye hirya no hino muri Afurika.
Ibindi bihugu birindwi bizafatanya n’u Rwanda kwakira iri rushanwa, harimo Australie, Indonesie, Uzbekistan, Azerbaijan, Ibirwa bya Maurice, Kazakhstan na Puerto Rico.
UMUSEKE.RW
