Mu gihe abiganjemo urubyiruko bakomeje guhura n’ibibazo by’ingutu bikomoka ku rujijo rw’icyerekezo, hagiye gutangira umushinga “Life of Impact” ugamije kubafasha kwimenya no kubaho ubuzima bufite intego.
Ni umushinga wateguwe na Ntihinduka Mordecalle, uzwi nka Decalle, akaba asanzwe ari umuhanzi w’indirimbo zo guhimbaza Imana ndetse n’umutoza w’amajwi muri Shiloh Choir ya ADEPR Muhoza mu Karere ka Musanze.
Avuga ko ugamije gufasha abantu kuva mu rujijo rw’ubuzima, bagasobanukirwa abo bari bo mu by’ukuri, bagafata imyanzuro ifite icyerekezo n’ingaruka nziza.
Agaragaza ko uzahuza kuramya no guhimbaza Imana n’ubujyanama bufatika, ndetse no kongerera ubushobozi abantu mu ngeri zitandukanye z’ubuzima.
Decalle ashimangira ko “Life of Impact” yubakiye ku gitekerezo cy’uko impinduka nyazo zitangirira imbere mu muntu, mu mitekerereze, mu mutima no mu myanzuro afata buri munsi.
Ati: “Ni umushinga ugamije kongerera ubushobozi abantu mu ngeri zirimo: imyemerere n’ubuzima bw’umwuka, imitekerereze n’imyanzuro, impano n’ubushobozi bwihariye, iterambere ry’umwuga n’imibereho, n’ibindi.”
Ku ikubitiro “Life of Impact project”, izatangirana n’igikorwa cyiswe “Shaping the Visionaries”, kigamije guhuza abantu bashaka kwiga, gutekereza no gutangira urugendo rushya rw’ubuzima bufite intego.
Uyu muhuro uzibanda ku: Kuramya no guhimbaza Imana, ibiganiro ku buzima bufite intego, kuganira ku bibazo nyakuri abantu bahura na byo mu buzima bwa burimunsi n’ibindi.
Hazagaragazwa ko kuramya Imana atari igikorwa cyo mu rusengero gusa, ahubwo ari uburyo bwo kubaho, gufata imyanzuro no gukorera Imana aho umuntu ari hose.
Decalle avuga ko n’abana bato batekerejweho aho bazashyirirwaho umwanya wihariye muri iki gikorwa kizajya kiba kenshi gashoboka.
Biteganyijwe ko ‘Shaping the Visionaries’ izaba tariki ya 26 Werurwe 2026, aho kwinjira bizaba ari ubuntu.
Umva indirimbo Muri Wowe ya Decalle Ntihinduka
NDEKEZI JOHNSON / UMUSEKE.RW
