FARDC yatewe n’inyeshyamba zitwa Bakata Katanga

Nibura abantu 8 baguye mu gitero inyeshyamba zitwa Bakata Katanga zagabye ku ngabo za Congo, FARDC mu Ntara ya Haut-Lomami.

Amakuru atangazwa na Radio Okapi ndetse yanemejwe mu itangazo ry’igisirikare cya Congo, yemeza ko umutwe w’inyeshyamba zitwa Mai-Mai Kata Katanga, zinazwi ku izina rya Mai-Mai Bakata Katanga, ziharanira kwigenga kw’Intara ya Katanga, zagabye ibitero ku ngabo za Congo hapfa abantu 8.

Umuyobozi w’agateganyo wa Teritwari ya Bukama, avuga ko inkomere zarashwe amasasu yanyuranagamo hagati y’abahanganye zikeneye kugezwa kwa muganga ahari ubufasha bwisumbuye kugira ngo bitabweho.

Madou Kalenga avuga ko babonye ingabo za Congo zizanye abasirikare bo kuzifata mu bitugu.

Ati “Twari tuzi ko batazanywe n’intambara ariko twumva mu kanya gato amasasu. Natwe ubuyobozi ntabwo twamenye ibirimo kuba.”

Twabajije abayobozi b’ingabo batubwira ko batewe n’inyeshyamba za Bakata Katanga.

Madou Kalenga akomeza agira ati “Habayeho imirwano yatwaye ubuzima bw’abantu 6 mu nyeshyamba za Bakata Katanga, n’abaturage b’abasivile babiri bishwe n’amasasu.”

Uyu muyobozi avuga ko abandi baturage 8 bakomeretse bajyanwa kwa muganga. Madou Kalenga asaba inzego za leta ku rwego rw’Intara no ku rwego rw’igihugu gufasha abakomeretse.

Ati “Bamwe muri bo bakeneye kubagwa ariko bitewe no kuba tudafite ibikoresho bikenewe, turakora ubwo buvugizi dusaba leta kudufasha.”

Igisirikare cya Congo Kinshasa, FARDC kivuga ko ku Cyumweru cyatewe n’inyeshyamba zitwa Mai Mai Zoulou muri kariya gace ka BUKAMA, muri Haut Lomami.

Imibare y’agateganyo ikagaragaza ko inyeshyamba 4 zishwe abandi 3 barakomereka naho ku ruhande rw’ingabo za leta hapfuye umusirikare umwe.

FARDC ivuga ko nyuma y’igitero ubuzima bwasubiye ku murongo, ndetse ikavuga ko abaturage bo muri kariya gace bakwiye gutekana kubera ko hafashwe ingamba zo kubarindira umutekano.