Uzabakiriho Cyprien wamenyekanye ku miyoboro ya YouTube nka Djihad, we na bagenzi be basabiwe gufungwa imyaka 5 no gutanga ihazabu ya miliyoni 3Frw kuri buri wese.
Uko ari batanu baregwa gukwirakwiza amashusho y’urukozasoni y’umuhanzi Uworizagwira Florien uzwi nka Yampano, yagaragaye yiha akabyizi n’umukobwa babanaga mu nzu “amwita umugore we”.
Ku isaha ya saa tanu (11h00 a.m) nibwo urubanza ruregwamo abarimo Djihad, Ishimwe Patrick bita Pazzoman, Ishimwe Francois, Kwizera Nestor na Kalisa John rwtangiye kuburanishwa n’Urukiko rw’Ibanze rwa Kicukiro.
Abo bakurikiranyweho uruhare rutandukanye mu gukwirakwiza amashusho y’urukozasoni y’umuhanzi Yampano n’umugore we.
ISHIMWE Patrick bita Pazzoman ni we wari ufite imibare banga ya email ya Yampano.
Ishimwe Francois we ngo yagurishaga amashusho y’urukozasoni ku bantu batandukanye, ndetse ngo si iriya video yonyine yari afite.
Kwizera Nestor we ni we wahaye iriya video Kalisa John. Naho Djihad ngo yafashe video ayishyira kuri status ya WhatsApp ye.
Ubushinjacyaha bwasabiye Djihad na bagenzi imyaka 5 y’igifungo n’ihazabu ya miliyoni 3Frw mu gihe Urukiko rwabahamya ibyaha.
Ibi Ubushinjacyaha bwabigarutseho ubwo abaregwa batangiraga kuburana mu mizi kuri uyu wa Kabiri tariki 17 Gashyantare, 2026.
Inteko y’umucamanza umwe n’umwanditsi w’urukiko niyo yaburanishije uru rubanza. Abaregwa bose bahakanye icyaha baregwa.
Ubushinjacyaha buhawe umwanya ngo busobanura neza uko icyaha cyakozwe, bwavuze ko umuhanzi Yampano ari we watanze ikirego arega aba bari kuburana mu rukiko.
Yavuze ko Djihad yafashe amashusho ya Yampano ari gukora imibonano mpuzabitsina ayashyira kuri Status ye ya WhatsApp, kuva ubwo amashusho atangira gukwirakwira ku mbuga nkoranyambaga.
Ubushinjacyaha bwabwiye Urukiko ko uwitwa Pazzoman ubundi witwa Ishimwe Patrick, hari video zigera kuri 5 za Yampano ari gukora imibonano mpuzabitsina yafashe.
Abaregwa bavuga ko Uwitwa Odette uba muri America (USA), ari we ufite umushinga wo gucuruza amashusho y’ubusambanyi.
Umunyamategeko wa Pazzoman yabwiye Urukiko ko ibihano bihabwa uwakoze icyaha, bityo ntacyo yavuga ku bihano kuko n’Ubushinjacyaha bwatanze ikirego kivangavanze.
Kalisa John we yavuze ko ibihano yasabiwe atabyemera kuko atigeze akora ibyaha. Ati “Ndasaba Urukiko kundenganura.”
Djihad yemereye Urukiko ko yabonye video ya Yampano iturutse muri Group (WhatsApp) ubwe yashinze iriho “abafana be” ariko atazi uwayishyizemo.
Ati “Njye nakoze ikiganiro (cyo gukebura kuri ibyo byabaye) nta video nasakaje, ahubwo abatanze ubuhamya muri RIB ni abantu dusanzwe dufitanye ikibazo mu buzima busanzwe, kuko nagiye mbakoraho ibiganiro mu bihe bitandakanye ndasaba kugirwa umwere kuko ndarengana.”
Me Fatakiramu Jean Pierre yabwiye Urukiko ko Djihad na Semuhungu Eric (uyu yatanze ubuhamya muri RIB) babanye mu nzu imwe, baza kugira ibyo bapfa baratandukana, akavuga ko byumvikana ko atari kumutangira ubuhamya bwiza muri RIB.
Uyu Semuhungu nyuma yo gutanga ubuhamya ashinja Djihad ngo yahise ajya gukora ibiganiro kuri za YouTube yishimira ifungwa rye.
Ati “Ndasaba ko uwo nunganira mu gihe muzaba mwiherereye mwazamugira umwere, cyangwa muzane izo video zikinirwe mu rukiko turebe aharimo ibyaha.”
Me Bayisabe Irene na we uri mu bunganira Djihad yavuze ko Umukiriya we yamaganye abakwirakwije amashusho ya Yampano, akemeza ko nta video Djihad yigeze akwirakwiza ahubwo amashusho yakwirakwijwe na Odette wiyita Zenda wigeze kuvugwa.
Ati “Ndasaba ko Djihad agirwa umwere agahabwa ubutabera.”
Icyemezo cy’urukiko nyuma y’impaka zamaze amasaha abiri, kizatangazwa ku wa 27/02/2026.
NKUNDINEZA Jean Paul / UMUSEKE.RW
