Ihuriro rya AFC/M23 ryatangaje ko indege nto zitajyamo abapilote (‘drones’) za Leta zarashe ku wa Kane no ku wa Gatanu mu gace ka Mikenke zikica abaturage.
Umuvugizi w’iryo huriro, Lawrence Kanyuka, yatangaje ku rubuga X ko izo ndege ‘zirashe buhumyi’ ahantu hatuwe n’abasivile.
Yongeraho ko ku mibare y’agateganyo “babiri bapfuye undi umwe akomereka bikomeye”.
Avuga ko ibyo bitero byabaye saa tatu n’iminota 40 z’ijoro ku wa Kane, bikomeza kugeza mu gitondo cyo ku wa Gatanu, ahagana saa mbiri n’iminota 20.
Atangaza ko ibyo bitero byasenye inzu nyinshi z’abaturage, ndetse imiryango myinshi ikaba yahunze aho yari ituye.
Kanyuka yashinje ubutegetsi bwa Kinshasa kudashyira mu bikorwa ibyo bwiyemeje mu biganiro bya Washington na Doha.
Avuga ko Ingabo za Leta ya Congo zikomeje gukorana n’imitwe y’inyeshyamba zitwaje intwaro zica abaturage muri Kivu y’Amajyepfo.
Kanyuka avuga ko Kinshasa igomba kuryozwa ibikorwa byo guheza no kurimbura abantu hashingiwe ku bwoko biri kubera i Minembwe, n’ubwicanyi bukomeje gukorerwa mu Burasirazuba bwa Congo.
Igisirikare cya Repubulika ya Demokarasi ya Congo ntacyo kiratangaza kuri ibi bivugwa na M23.
