Imikino ya 1/8 mu irushanwa ry’amakipe yabaye ayambere i Burayi, iy’umunsi wa mbere irangiye amakipe abiri akomeye mu Bwongereza asezerewe agayitse ku giteranyo cy’ibitegko 13 -3.
Manchester City yari ku kibuga cyayo Etihad Stadium ifite icyizere cyo kuzamuka umusozi wo kwishyura ibitego 3-0 yatsindiwe i Madrid mu cyumweru gishize mu mukino ubanza.
Igice cya mbere nticyayihiriye kuko ku munota wa 20 w’umukino kizigenza, Bernardo Silva yabonye ikarita itukura kubera gukuramo umupira ugana mu izamu akoresheje inkokora.
Umusifuzi Clement Turpin ukomoka mu Bufaransa yahise anatanga penaliti, yatsinzwe na Vinicius Junior ku munota wa 22 w’umukino.
Erling Haaland yishyuye icyo gitego ku munota wa 41. Gusa igice cya kabiri cyari kigoye kuri Manchester City ituzuye, cyakora yakomeje kwihagararaho, inasatira izamu ibona uburyo bwinshi biguma uko.
Ku munota wa nyuma w’inyongera, Vinicius Junior yashyizemo agashyinguracumu, umukino urangira ari Manchester City 1 – 2 Real Madrid (igiteranyo 1- 5).
Chelsea ku rundi ruhande ku kibuga Stanford Bridge yari yakiriye Paris St.Germain. Na yo yagombaga gukora ibitangaza ikishyura ibitego 3 kuko mu Bufaransa yahatsindiwe 5-2.
Byabaye bibi cyane kuko mu Bwongereza Chelsea yahatsindiwe ibitego 3-0 (igiteranyo kiba 2-8).
Ikipe ya Arsenal na yo yari mu rugo ikina na Bayer Leverkusen yo mu Budage. Amahirwe Arsenal yari ifite yanganyije 1-1 hanze.
Mu rugo yitwaye neza itsinda Bayer Leverkusen ibitego 2-0, bitumye inakomeza mu mikino ya 1/4.
Arsenal izahura na Sporting CP yo muri Portugal yo yakoze ibitangaza itsinda Bodoe/Glimt ibitego 5-0, nyamara mu mukino ubanza muri Denmark yari yahatsindiwe ibitego 3-0.
Bivuze ko Real Madrid mu mukino wa 1/4 izahura n’ikipe izamuka mu mukino wa Atalanta vs Bayern Munich.
Paris Saint-Germain izakina n’itsinda hagati ya Galatasaray/Liverpool.
Ikipe izamuka hagati ya Newcastle vs Barcelona izahura n’ikipe izamuka hagati ya Atlético Madrid na Tottenham.
Muri iki cyiciro imikino ibanza izakinwa tariki 7 – 8 Mata, naho kwishyura ni tariki 14 – 15 Mata, 2026.
Imikino yindi ine itegerejwe kuri uyu wa Gatatu.
Ku isaha ya saa 19:45 Barcelona vs Newcastle United naho saa 22:00 Bayern Munich vs Atalanta; Liverpool vs Galatasaray na Tottenham Hotspur vs Atletico Madrid.
UMUSEKE.RW
