Impuzamashyirahamwe y’Umupira w’Amaguru muri Afurika, (CAF) yafashe umwuzuro w’uko ikipe y’igihugu ya Senegal yamburwa igikombe cy’Afurika yari yaratwaye kigahabwa Maroc yari yaratsindiwe ku mukino wa nyuma.
Itangazo CAF yasohoye mu ijoro ryo ku wa 17 rishyira ku wa 18 Werurwe 2026, rivuga ko Senegal itewe mpaga y’ibitego 3-0 kubera kwivana mu kibuga ku mukino wa nyuma, ndetse ko Maroc ari yo yatwaye CAN 2025.
Rivuga ko kandi uyu mwanzuro wafashwe na Komite y’ubujurire ya CAF igendeye ku ngingo ya 82 na 84 y’Amabwiriza y’igikombe cy’Afurika (CAN).
Ku wa 18 Mutarama 2026, i Rabat muri Maroc nibwo habaga umukino wa nyuma w’Igikombe cya Afurika wahuzaga Ikipe y’Igihugu ya Senegal na Maroc.
Muri uwo mukino ku munota wa 90+8, El Hadji Malick Diouf wa Senegal yategeye Brahim Díaz mu rubuga rw’amahina, Maroc ihabwa penaliti itavuzweho rumwe n’impande zombi.
Umutoza wa Sénégal, Pape Thiaw yahise abwira abakinnyi be gusohoka mu kibuga bakava mu mukino.
Gusa abakinnyi baje kugaruka mu kibuga mu babisabwe na Sadio Mané nyuma y’uko na we avuganye n’umunyabigwi w’iyi kipe, El Hadji Diouf.
Penaliti yahawe Brahim Díaz, ariko ayitera mu buryo bworoheje ayishyira mu maboko y’umunyezamu, Édouard Mendy, hongerwaho iminota 30 yo kwikiranura.
Ku munota wa 93 w’umukino , Pape Gueye yashyizemo igitego cya Sénégal nyuma yo kwirukankana umupira agatera ishoti rikomeye mu izamu rya Maroc.
Uwo mukino warangiye Ikipe y’Igihugu ya Senegal itsinze igitego 1-0, itwara igikombe gusa nyuma Maroc irarega isaba isubirwamo ry’umukino.
MUGIRANEZA THIERRY/ UMUSEKE.RW
