Urugereko rwihariye rushinzwe kuburanisha ibyaha mpuzamahanga n’ibyambukiranya imbibi rufite icyicaro i Nyanza, rwafashe icyemezo ko ‘umutangabuhamya’ ushinja Béatrice Munyenyezi ko yamuhaye Interahamwe zikamusambanya atari ngombwa kuzanwa mu rukiko ngo atange ubwo buhamya.
Kuri uyu wa 12 Gashyantare, 2026 abacamanza batatu n’umwanditsi w’urukiko ni bo baburanishije Béatrice Munyenyezi nk’uko bisanzwe, imbere yabo ku ruhande rw’iburyo hari abashinjacyaha babiri basanzwe bashinja muri uru rubanza naho ibumoso bw’abacamanza hari Béatrice Munyenyezi ari hagati y’abanyamategeko be babiri, ari bo Me Bruce Bikotwa na Me Felecien Gashema.
Ukuriye inteko iburanisha Béatrice Munyenyezi yabanje guha ijambo ngo ubushinjacyaha buvuge ku mutangabuhamya bifuje ko yahamagarwa n’urukiko.
Umushinjacyaha ahagurutse ati “Nyakubahwa Perezida w’inteko iburanisha, turasaba ko hari umutangabuhamya wahamagazwa n’urukiko na we agatanga ubuhamya kuko ahungira kuri Purefegitura (i Butare) yakorewe ihohoterwa rishingiye ku gitsina bigizwemo uruhare na Béatrice Munyenyezi.”
Umucamanza ati “Uruhande rwa Béatrice Munyenyezi murabivugaho iki?”
Me Bruce Bikotwa umwe mu banyamategeko babiri bunganira Béatrice Munyenyezi yahagarutse ati “Turabashimiye Nyakubahwa Perezida namwe banyakubahwa bacamanza, mbere na mbere tubifurije umwaka mushya muhire!”
Umucamanza ati “Kuri twese koko kuva uyu mwaka watangira nibwo tukibonana.”
Me Bruce Bikotwa agihagurutse akomeza agira ati “Ibyo Ubushinjacyaha buvuze biradutunguye, muduhe umwanya tubanze tubiganireho hagati yacu.”
Umucamanza ati “Nta kibazo mujye hanze mubanze mubiganireho.”
Nyuma y’iminota icumi Béatrice Munyenyezi ari kumwe n’abanyamategeko be babiri, bagarutse mu rukiko.
Me Bruce Bikotwa yigiye imbere yegera abacamanza maze afata ijambo ati “Turabashimiye, uru rubanza rufite uko ruteye kandi n’urukiko rwabitanzeho umurongo, uru rubanza rwaburanishijwe gahunda kuri gahunda (step by step), hahamagawe abatangabuhamya mu rukiko, tujya kuri terrain n’ahakekwa ko habereye ibyaha, twe kuba Ubushinjacyaha busaba ko hari undi mutangabuhamya wazanwa mu rukiko, turasanga ari uburyo bwo gutinza urubanza kandi ku bushake.”
Umunyamategeko Bruce Bikotwa agihagurutse yakomeje agira ati “Ubushinjacyaha bwo bwivugiye ko bakomeje iperereza, ese iryo perereza bakomeje gukora rizarangira ryari? Ese rizarangira kugeza isi irangiye?”
Umunyamategeko Bruce Bikotwa akomeza agira ati “Twe dusanga nta mpamvu yatuma uwo mutangabuhamya azanwa mu rukiko kuko abatangabuhamya barabajijwe baranazanwa mu rukiko, ibyabo birarangira kandi urubanza rwa Munyenyezi Béatrice gutinda ni ugutesha agaciro ubutabera buboneye.”
Ubushinjacyaha bwongeye gufata ijambo buvuga ko bo badatinza urubanza, ahubwo uko kuba yazanwa mu rukiko ari urukiko rwabibajije atari ubushinjacyaha bwabibajije, naho kuba bakora iperereza bashaka ibindi bimenyetso ari uburenganzira bwabo.
Umushinjacyaha ati “Ko na bo hari ibindi bimenyetso bongeyemo vuba aha natwe tuvuge ko na bo bari gutinza urubanza?”
Icyemezo cy’urukiko
Urukiko rwemeje ko uwo mutangabuhamya atari ngombwa kuzanwa mu rukiko, cyakora ubushinjacyaha bugomba kuvuga ibikubiye mu nyandikomvugo y’ibyo ashinja Béatrice Munyenyezi byaba ngombwa uruhande rwa Béatrice Munyenyezi rukabivugaho.
Ubushinjacyaha buti “Béatrice Munyenyezi yatoranyije umugore mu bandi Interahamwe zijya kumusambanya.”
Umushinjacyaha yavuze ko uwo mutangabuhamya bifuza ko yazanwa mu rukiko yababwiye ko muri Jenoside yakorewe Abatutsi mu 1994 yavuye iwabo i Ndora, mu karere ka Gisagara ahungira kuri EER hafi no Kwa Pauline Nyiramasuhuko akaba nyirabukwe wa Béatrice Munyenyezi, maze aho hari bariyeri ahabona Béatrice Munyenyezi, Pauline Nyiramasuhuko na Arsene Shalom Ntahobari (umugabo wa Béatrice Munyenyezi) maze Munyenyezi we yabaga yaka ibyangombwa ku buryo umututsi wahanyuraga yahagarikwaga maze akajyanwa kwicwa.
Uriya mutangabuhamya yabwiye ubushinjacyaha ko nyuma yaje guhungira kuri Purefegitura maze Béatrice Munyenyezi n’umugabo we Arsene Shalom Ntahobari, ndetse na nyirabukwe Pauline Nyiramasuhuko bazana imodoka yajyanaga abatutsi kwicwa.
Uriya mutangabuhamya kandi yakomeje abwira ubushinjacyaha ko Béatrice Munyenyezi yamutoranyije mu bandi maze interahamwe zijya kumusambanya ubwo bari kuri Purefegitura.
Umucamanza ati “Reka duhe uruhande rwa Béatrice Munyenyezi kugira icyo ruvuga kuri ibyo.”
Me Bruce Bikotwa ahagurutse ati “Ntitwaje twiteguye kubivugaho muzaduhe umwanya wabyo tubivugeho.”
Munyenyezi avuga ko hari abatangabuhamya batanze ubuhamya mu Rwanda butandukanye n’ubwo batanze muri America.
Me Bruce Bikotwa yasabye igihe cyo kugira ngo bazategure inyandiko igaragaza ko hari ibyo babonye ahakekwa ko habereye ibyaha bitari mu nyandiko itanga ikirego kirega Béatrice Munyenyezi.
Me Bruce Bikotwa yavuze ko bafite ‘flash disk’ iriho ko hari abatangabuhamya bashinja Béatrice Munyenyezi, ibyo bavuze mu Rwanda bitandukanye n’ibyo bari bavugiye muri America ubwo bajyagayo gutanga ubuhamya bushinja Munyenyezi Béatrice.
Me Bruce Bikotwa ati “Iyo flash disk iyo tuyihaye igororero ntibemera ko Munyenyezi Béatrice yareba ibiriho.”
Umushinjacyaha ahawe ijambo yavuze ko bidakwiye ko iyo ‘flash disk’ ihabwa Munyenyezi Béatrice kuko hashobora kuba hariho n’ibindi bitajyanye n’urubanza, kandi abagiye gushinja Béatrice Munyenyezi bari baragiye gusobanura ko yagiye muri America bidakurikije amategeko ataburanaga ku byaha bifitanye isano na Jenoside aregwa, none ibyo basaba bitahabwa agaciro.
Me Bruce Bikotwa yongeye guhabwa ijambo ati “Nyakubahwa Perezida iyo ‘flash disk’ izajya ibikwa n’ubuyobozi bw’igororero bube aribwo buyicunga, kandi ‘flash disk’ si grenade, si igisasu ku buryo batareka ngo umukiriya wacu yerekane ibimenyetso bimushinjura.”
Umucamanza ati “Me Bruce Bikotwa muribuka ko turi mu bujurire?” Me Bruce Bikotwa mu gusubiza ati “Yego, turabyibuka.”
Umucamanza yongera kubaza Bruce Bikotwa ati “Muribuka se ko uru rubanza rutoherejwe mu Rwanda ngo ruhaburanishirizwe?” Me Bruce Bikotwa na we ati “Yego, turabyibuka.”
Umucamanza ati “Komeza ni wowe wari ufite ijambo.”
Me Bruce Bikotwa na we ati “Nyakubahwa Perezida nkomeze, mutambwiye impamvu mumbajije ibyo bibazo?”
Umucamanza ati “Erega natwe ntitukubajije ngo ukunde uyimenye!”
Me Bruce Bikotwa aseka ahita acyebuka areba Béatrice Munyenyezi ati “Nyakubahwa Perezida Munyenyezi Béatrice yambwiye ko ari mu biganza byanyu icyo muzamugenera azacyakira uko, sibyo Munyenyezi?”
Munyenyezi Béatrice azamuye ibiganza byombi bifatanye nk’ikimenyetso cyo kubaha urukiko yemerera urukiko ko ibyo Me Bruce Bikotwa avuze na we abyemera atyo.
Urukiko rwafashe icyemezo ko ibyo Béatrice Munyenyezi asaba ko yareba kuri iriya ‘flash disk’ yazabirebaho noneho akabyongera muri system ihuza ababuranyi hakorwa umwanzuro w’urubanza rwe yiregura ku byo aregwa.
Béatrice Munyenyezi uregwa none yari umukazana wuwahoze ari Minisitiri w’iterambere ry’umuryango ari we Pauline Nyiramasuhuko, Munyenyezi afite umugabo witwa Arsene Shalom Ntahobari, bombi bafungiye hanze y’u Rwanda bazira ibyaha bifitanye isano na Jenoside ibyo aregwa byose aburana abihakana.
Yabaga muri Leta zunze Ubumwe z’America azanwa mu Rwanda. Niba nta gihindutse uru rubanza ruzakomeza muri Werurwe 2026.
Theogene NSHIMIYIMANA
UMUSEKE.RW
