Saa 00h10: Umukino wari witezwe na benshi mu bakurikira Shampioyona yo mu Bwongereza, urangiye West Ham ihagamye Manchester City, yashakaga kugabanya icyinyuranyo cy’amanota hagati yayo na Arsenal ya mbere ubu n’amanota 70.
Manchester City yinjiye mu kibuga Arsenal imaze gukora ibidasanzwe itsinda mu minota ya nyuma Everton ibitego 2-0.
Ikipe ya Guardiola yinjije igitego cya Bernardo Silva ku munota wa 31 w’umukino, Konstantinos Mavropanos wakiniye Arsenal, imugurisha muri West Ham yishyura icyo gitego n’umutwe ku munota wa 34 w’umukino ari na ko umukino urangiye.
West Ham irwana no kuguma mu cyiciro cya mbere mu Bwongereza yigiye imbereho gato n’amanota 29 ikaba iri ku mwanya wa 17. Manchester City hano hashobora kuba ariho itanze ikarita y’icyatsi kuri Arsenal ngo izitwarire igikombe, ikaba isizwe amanota 9 nubwo ifite umukino w’ikirarane, mu gihe shampiyona ibura imikino 7 ngo irangire.
INKURU YABANJE: Ikipe ya Arsenal imwe mu zifite abafana benshi mu Rwanda no muri Africa, yongereye amahirwe yo kuba yatwara igikombe cya Shampiyona y’Ubwongereza muri uyu mwaka, nyuma yo gutsinda Everton ibitego 2-0.
Umwe mu bafana ba Arsenal i Kigali yabwiye UMUSEKE ati “Bigeze ku munota wa 70 umutima wenda guhagarara ariko ubu ndishimye kuruta ikindi gihe.”
Amakipe abiri yari mu kibuga afite imihigo itandukanye, Arsenal yari ku kibuga cyayo Emirates Stadium ifite intego yo gukuraho umumwa w’ibikombe kuko iheruka kugitwara mu mwaka wa 2005, uyu mwaka ikaba ihabwa amahirwe nyuma yo gutangira umwaka w’imikino iri imbere ariko abantu bayitega iminsi ko itazashobora kugera ku munota wa nyuma ikiri imbere.
Everton yatangiye nabi shampiyona ndetse bamwe bibwira ko izamanuka mu cyiciro cya kabiri, ariko yabashije kwisuganya, yongera gutsinda ubu iri ku mwanya wa 8 yo irashaka kuba yazakina imikino y’Iburayi ya Europa League.
Mu kibuga Arsenal yatangiye umukino neza, ariko kurema amahirwe yavamo igitego biragorana.
Igice cya mbere cyarangiye ari 0-0, ndetse Evarton yacungiraga ku makosa ya Arsenal ari yo yabonye amahirwe menshi yo kuba yafungura amazamu, gusa umunyezamu David Raya agenda ayitabara.
Mu gice cya kabiri, Everton yakomeje kugarira ishaka nibura ko yaza gucyura inota rimwe.
Ku munota wa 61′ Kai Havertz usatira izamu ku ruhande rwa Arsenal yavuye mu kibuga hinjira Viktor Gyökeres, naho ku munota wa 74′ Riccardo Calafiori ukina inyuma asimburwa na Piero Hincapié mu gihe Martín Zubimendi yavuyemo na we hinjira umukinnyi w’imyaka 16 n’iminsi 73, Max Dowman wanahinduye byinshi mu mukino.
na Max Dowman bishimira igitego
Max Dowman ashobora kuzaba ari we witirirwa igikombe igihe Arsenal yagitwara, kubera uburyo yagaragaye muri uyu mukino w’ingenzi wa Everton aho kuwutsinda bitumye Arsenal irusha Manchester City ihanganye na yo amanota 9 (iyi kipe ubwo twandika inkuru iri gukina na West Ham ari 0-0).
Uyu mukinnyi muto wa Arsenal wananditse amateka yo kuba umukinnyi muto kurusha abandi utsinze igitego muri Shampiyona y’Icyiciro cya Mbere mu Bwongereza, yahinduye byinshi mu minota mike yakinnye, harimo gucenga, kunaniza abakinnyi, gukinisha ikipe ya Arsenal yari yabuze umujyo, no guteza ibibazo Everton.
Ku munota wa 89, Max Dowman yatanze umupira muremure ugera kuri Piero Hincapié awuha Viktor Gyökeres wasabwaga gusa kuwukozaho ikirenge ukajya mu izamu, ni bwo Arsenal yafunguye amazamu.
Ku munota wa 90 + 7′ ari na ryo segonda rya nyuma, Everton yabonye corner ariko bayiteye, Arsenal igarura umupira mu kibuga, izamu rya Jordan Pickford ryarimo ubusa, nibwo Max Dowman yacenze abakinnyi babiri bari inyuma aragenda wenyine atsinda igitego gishimangira intsinzi.
Ibitego 2-0 niko Arsenal yasoje umukino wayo na Everton biha ibyishimo umutoza n’abafana b’iyi kipe yamamaza u Rwanda mu bukangurambaga bwitwa Visit Rwanda, ikaba ishora gutwara igikombe nyuma y’imyaka 21 ishize.
Ku munsi wa 31 kuri Arsenal nubwo izindi zo ziri ku munsi wa 30, indi mikino yabaye Chelsea mu rugo yatsinzwe na Newcastle 1-0, Burnley 0-0 AFC Bournemouth; Sunderland 0-1 Brighton.
UMUSEKE.RW
