Umuhanzikazi mu njyana gakondo, Ishimwe Adelaide, ukoresha amazina ya Addy d’Afrique, yasohoye indirimbo yise “Banguka Unyihoreze” irata ubutwari bw’ababyeyi b’abagore, abashimira ubwitange n’umutima wabo.
Ni indirimbo yitsa ku butumwa bushimira umutima w’urukundo n’ubwitange abo babyeyi bagaragaza mu miryango yabo no mu bihe bigoye.
Addy d’Afrique yabwiye UMUSEKE ko ababyeyi b’abagore ari isoko y’urukundo n’ubwitange ku miryango, asanga nta kindi yabitura kiruta indirimbo nk’iyi.
Ati: “Babyeyi, muri isoko y’urukundo n’ubwitange ku miryango; tubashimira umutima wanyu uhora uzirikana ineza.”
Yongeraho ko ababyeyi b’abagore bifitemo impano idasanzwe yo kwikorera imitwaro y’urugo no kurera nta kwinuba.
Ati: “Turabibona ko badasanzwe, turabibona ko ari ingenzi kandi turabakunda cyane. Ni urugero rwiza mu bibi no mu byiza; turabibona ubwitange bwabo, bakomeze batubere urumuri. Ni indashyikirwa.”
Addy agaragaza kandi ko iyi ndirimbo ihamagara umubyeyi w’umugore, ikamugaragariza urukundo n’urukumbuzi byuzuye umutima.
Ati: “Ni ijwi ry’umwana wifuza ko mama yumva amagambo atabashije kuvuga mu buzima busanzwe.”
Mu buryo bw’amajwi, indirimbo “Banguka Unyihoreze” yakozwe na Producer Lou, naho amashusho atunganywa na Rugema.
Reba indirimbo ‘Banguka Unyihoreze’ ya Addy d’Afrique
NDEKEZI JOHNSON / UMUSEKE.RW
