Mu mujyi wa Kalemie mu Ntara ya Tanganyika, hatangiye urubanza rw’abasirikare n’abapolisi bashinjwa guhunga umujyi wa Uvira ugafatwa na AFC/M23.
Abasirikare n’abapolisi barenga 120 baretse umujyi wa Uvira ubwo wafatwaga na AFC/M23 baburanishijwe ku wa Gatanu ku rukiko rwa gisirikare mu mujyi wa Kalemie.
Abo baregwa bakurikiranyweho guta inshingano zabo ubwo umujyi wa Uvira wafatwaga na AFC/M23 tariki 10 Ukuboza, 2025.
Iburanisha ryabaye ku wa Gatanu ryibanze cyane ku kumenya imyirondoro y’aba baregwa. Muri aba baregwa 68 ni abasirikare, naho 56 ni abapolisi muri bo 66 imyirondoro yabo yamaze kumenyekana.
Uru rubanza rwakomeje no ku wa Gatandatu nk’uko byemejwe na Lt.Col Désiré Dionda Mukole ukuriye urukiko rwa gisirikare rw’i Kalemie.
Yavuze ko urubanza rugamije kuburanisha no guhana abananiwe inshingano zabo, bagatandukira amabwiriza agenga igisirikare bagahunga inyeshyamba.
UMUSEKE.RW