Abagize itsinda ryaturutse muri Espagne mu kipe ya Atlético Madrid, bageze mu Rwanda aho bazanywe no kugirana ibiganiro n’u Rwanda ku Iterambere rya Siporo no kubyaza umusaruro abafite impano muri ruhago.
Ibi byatangajwe n’Ikigo cy’Igihugu cy’itarembere, RDB. Kibinyujije ku rukuta rwa X, cyatangaje ko gifatanyije na Minisiteri ya Siporo, bakiriye itsinda ry’abaturutse mu kipe ya Atlético Madrid iri mu zifite amazina manini muri Espagne.
Itsinda ry’iyi kipe isanzwe ifitanye amasezerano y’imikoranire n’u Rwanda ishingiye ku Bukerarugendo, ryaje mu Rwanda riyobowe n’uhagarariye iyi mishinga, Guillermo Alonso Álvarez.
Mu byo impande zombi zaganiriye, harimo amasezerano y’imikoranire, Iterambere rya Siporo muri rusange, kubyaza umusaruro w’impano u Rwanda rufite, gukomeza gukuza Siporo y’u Rwanda, Ubukerarugendo n’Ishoramari.
U Rwanda n’iyi kipe, bifitanye amasezerano ya Visit Rwanda azageza mu 2028. Ni amasezerano yashyizweho umukono muri Mata uyu mwaka. Yaje yiyongera ku zindi zamamaza u Rwanda nka Arsenal, PSG na Bayern Munich.
UMUSEKE.RW