Abagaba bakuru b’ingabo zirwanira ku butaka bategerejwe mu nama i Kigali

Igisirikare cy’u Rwanda cyatangaje ko cyizakira inama y’Abagaba Bakuru b’ingabo zirwanira ku butaka bo muri Africa n’ahandi ku Isi.

Iyi nama izaba tariki 21-22 Ukwakira, 2025 ni ku nshuro ya kabiri izaba ibaye muri rusange, ikazaba ifite insanganyamatsiko igira iti “Gukoresha ubushobozi bw’ingabo zirwanira ku butaka mu kuzamura ishyirwa mu bikorwa ry’ingamba z’amahoro n’umutekano.”

Itangazo rya Ministeri y’Ingabo mu Rwanda, rivuga ko iriya nama izaba irimo Abagaba b’ingabo zirwanira ku butaka bo mu bihugu bya Africa n’ahandi ku Isi.

Iyi nama ngo irerekana umuhate u Rwanda rufite mu guteza imbere ubufatanye mu bya gisirikare, kujya inama, kubungabunga amahoro n’umutekano, no gusangira ubunararibonye mu by’imiyoborere y’ingabo ku mugabane wa Africa.

Minisiteri y’Ingabo mu Rwanda, ivuga ko iyi nama izaba urubuga “rukomeye ku bayobozi b’ingabo rwo kungurana ibitekerezo, gushimangira ubufatanye, no gusuzumira hamwe uburyo bwo gufatanya gukemura ibibazo bishya n’ibikomeje kwigaragaza bijyanye n’umutekano.

Uretse kuba iyi nama yerekana icyerekezo gihuriweho cya Africa gishingiye ku bufatanye hitawe ku baturage, mu gihe isi ihanganye n’ibibazo by’umutekano bitandukanye, iyi nama ngo ni n’amahirwe yo kuganira ku cyerekezo cy’ahazaza mu guhangana n’imitekerereze mishya y’intambara zigenda zivuka, ndetse n’impamvu zigaragaza ko ari ngombwa zafatwa mu kubungabunga amahoro ku mugabane wa Africa n’ahandi ku isi.

Iyi nama izaba irimo abayobozi b’ingabo, inzobere mu bya gisirikare, n’abandi bafatanyabikorwa b’ingenzi mu by’umutekano n’amahoro mu karere, no ku rwego mpuzamahanga.

UMUSEKE.RW