Aba-Legends b’abagore bizihirije Umunsi w’Umugore i Ngoma – AMAFOTO

Abagore bakiniye ikipe y’Igihugu y’u Rwanda, She-Amavubi n’andi makipe yakinnye shampiyona y’abagore, bifatanyije n’abatuye mu Karere ka Ngoma mu kwizihiza Umunsi Mpuzamahanga w’Umugore wo mu Cyaro.

Ku wa Gatatu, tariki ya 15 Ukwakira 2025, usanzwe ari Umunsi Mpuzamahanga wo Kwizihiza w’Umugore wo mu Cyaro. U Rwanda rwawizihizaga ku nshuro ya 28 kuva mu 1997.

Mu rwego rwo kwegera abagore bo mu cyaro no kubashishikariza kwitinyuka bakerekana impano bifitemo, Ishyirahamwe ry’Umupira w’Amaguru mu Rwanda, Ferwafa, ryahisemo kwegereza abaturage b’i Ngoma abagore bahoze baconga ruhago mu myaka yashize.

Iyi kipe yitwa “Fearless Legend Team”, irimo abahoze bakinira She-Amavubi mu myaka yo ha mbere nka Ingabire Judith, Nibagwire Sifa Gloria wayibereye kapiteni, Kayitesi Egidie wayikiniye akanatoza amakipe arimo APR WFC, AS Kigali WFC n’izindi, Uwizeyimana Helena “Garçon” wakiniye izirimo AS Kigali na She-Amavubi n’izindi, Uwineza Nadia wakiniye izirimo APR WFC, AS Kigali WFC na She-Amavubi n’izindi.

Harimo kandi andi mazina yahoze akina ruhago nka Nkamiye Seraphine wakiniye izirimo Inyemera WFC y’i Gicumbi, Mukandayisenga Yvette wakiniye APR WFC, Musabaganwa Christine “Tina” wakiniye Urumuri yashinzwe bwa mbere muri ruhago y’abagore nyuma ya Jenoside yakorewe Abatutsi mu 1994 n’abandi barimo Hidaya n’abandi.

Aba bigabanyijemo amakipe abiri aho imwe yari iyobowe na Nibagwire Sifa Gloria mu gihe indi yari iyobowe na Ingabire Judith. Iya Sifa ibifashijwemo Uwase Seraphine watsinze ibitego bitatu na Kankindi Fatuma “Micky”, yatsinze iya Judith ibitego 4-0 maze yegukana igikombe cyahatanirwaga kuri uyu munsi.

Insanganyamatsiko y’uyu mwaka, yari “UMUGORE NI UW’AGACIRO.” Uretse gukina uyu mukino wanarebwe n’abarimo Meya w’Akarerere ka Ngoma, Niyonagira Nathalie, abagore bibukijwe ko bakwiye gukomeza kwitinyuka bakabyaza umusaruro amahirwe Igihugu cyabahaye.

Ikipe yegukanye igikombe, yahembwe miliyoni 2 Frw n’imipira yo gukina ibiri ndetse yambikwa imidari. Iya Kabiri yambitswe imidari inahabwa imipira ibiri yo gukina inahabwa miliyoni 1 Frw.