Abanyarwanda bigaragaje mu irushanwa ry’iteramakofe rya ‘Kigali Fight Night’ ryabaga ku nshuro ya kabiri, aho abarwanye bose mu cy’icyiciro cy’ababigize umwuga batahanye intsinzi.
Ni irushanwa ryari ribaye ku nshuro ya kabiri ribera mu masangano y’imihanda ya Kigali Convention Centre mu ijoro ryo ku wa Gatandatu tariki ya 28 Werurwe 2026.
Ni irushanwa ryateguwe na Silverback Sports ku bufatanye n’Ishyirahamwe ry’Umukino w’Iteramakofe mu Rwanda (RBF), ryahuje abakinnyi bo mu bihugu bya Afurika birimo u Rwanda, Uganda, Cameroun, Gabon, Tanzania, Nigeria, Repubulika Iharanira Demokarasi ya Congo, Algeria na Malawi.
Uretse ibipfunsi bwavuzaga ubuhuha, abari mu ihema ryari mu masangano y’imihanda ya Kigali Convention Centre baryohewe n’abahanzi barimo Riderman na Bull Dog bataramye ndetse n’umuziki wacurangwaga n’abavangamiziki.
Harwanye kuva ku bana bakiri bato mu mukino w’iteramakofe, abatarabigize umwuga, abari n’abategarugori ndetse n’ababigize umwuga.
Mu babigize umwuga, Abanyarwanda bagize ijoro ryiza aho Hagenimana Aimable na Frank Kazungu batsinze imikino barwanye.
Hagenimana Aimable yatsinze umurwano wamuhuje na Muhindo Vianney Bahati ukomoka muri Repubulika Iharanira Demokarasi ya Congo.
Undi munyarwanda Frank Kazungu wari ufite abafana benshi yatsinze bimworoheye Umugande Rogers Kamulegeya.
Mu yindi mirwano yakinwe, Mugunge Augustin Wisomba wo muri Repubulika Iharanira DemokarasiyaCongo yatsinze Shetebo Bienfait nawe wo muri Repubulika Iharanira Demokarasi ya Congo.
Daniela Muleketsi Nsii wo muri Repubulika Iharanira Demokarasi ya Congo yatsinze Martha Akinyi wo muri Uganda.
Umunya-Gabon Kassa Kingbo Odilon Hans yatsinze Umugande Saidi Chako.
Umunya-Nigeria Nene Joy Ojo yatsinze Umunya-Tanzania Zawadi Kutaka.
Mu murwano waranzwe no guhatana no kwihangana, Umunya-Algeria Abderrezzak Lamrani yatsinze bigoranye Umunya-Malawi Simion Tchetha.
Jerry Katamba ukomoka muri Repubulika Iharanira Demokarasi ya Congo yatsinze Ali Mkojani ulomoka muri Tanzania.
Umurwano wari utegerejwe na benshi wahuje Tamba Merlin ukomoka muri Cameroon na Kivu Karume ukomoka muri Tanzania, warangiye uyu Munya-Cameroon umaze kubaka izina atsinze Kivu Karume.
Mu batarabigize umwuga, Cyusa Albert yatsinzwe na Nsabimana Anelika. Romeo Mungungu atsinda Grady.
Bibwireyezu Betishabah yatsinzwe na Uwineza Deborah. Ngabonziza Fenias atsinda Kevin Habineza, naho Lumumba Kabisa Maheshi atsinda Sibomana Olivier, Mugenga Innocent atsinda Hakime Nizeyimana, naho Mbazira Elifaz atsinda Niyonzima Pacific.
MUGIRANEZA THIERRY/ UMUSEKE.RW
