Ubuyobozi bw’Umurenge wa Rugendabari mu Karere ka Muhanga buvuga ko amazi y’umugezi wa Nyabarongo yasendereye mu Muhanda ahagarika imodoka zavaga i Muhanga zijya muri Ngororero.
Mu mvura yaguye mu ijoro ryakeye rishyira kuri uyu wa Mbere, tariki 23 Werurwe, 2026 yatumye ingendo z’imodoka ziva i Muhanga zerekeza mu Karere ka Ngororero zihagarara.
Umunyamabanga Nshingwabikorwa w’agateganyo w’Umurenge wa Rugendabari Bizimana Sixbert yabwiye UMUSEKE ko iyi mvura yabanje kumanura inkangu nyinshi zifunga umuhanda wa kaburimbo mu Kagari ka Gasave.
Bizimana avuga ko iki kibazo cyatwaye amasaha menshi kuko abagenzi n’abakozi muri rusange bajyaga mu mirimo bategereje ko inkangu ivanwamo, abandi bahitamo kugenda n’amaguru kugira ngo bagere ku Murenge.
Ati: ”Usibye ikibazo cy’inkangu zafunze umuhanda Gasave – Rugendabari mu Karere ka Muhanga, abagenzi batubwiye ko n’umuhanda wo ku Cyome amazi ya Nyabarongo ndetse n’ay’imivu yarengeye umuhanda twihutira kujyayo.”
Bizimana avuga ko bahageze basanga ari uko bimeze, ibi bikaba byatumye abagenzi bava mu Ngororero bakoresha urugendo rw’amaguru bakazamuka umusozi wo mu Isanteri ya Gatumba bakabona kugera ku kiraro cya Nyabarongo.
Gitifu Bizimana akomeza avuga ko abafite intege barimo gukoresha urugendo rw’amaguru bava mu Ngororero, bambuka Nyabarongo bagatega moto zibajyana ahitwa i Mushishiro ari naho bafatira imodoka ziberekeza mu Mujyi wa Muhanga.
Gitifu akavuga ko hari n’amazi menshi yamanutse ava ku Rugomero rw’amashanyarazi rwa Nyabarongo hiyongeraho ay’imvura asendera muri uyu muhanda wo ku Cyome.
Mu Kiganiro n’Abanyamakuru cyabaye mu cyumweru gishize, Ubuyobozi bw’Akarere ka Ngororero bwavuze ko hari inyigo yo gukora uyu muhanda wo ku Cyome yamaze gukorwa, ndetse RTDA ikaba yaratanze isoko ryo kuwigiza hejuru ku buryo mu minsi mikeya, imirimo yo kuwutunganya izatangira.
MUHIZI ELISÉE
UMUSEKE.RW/Ngororero.
