Ingabo za Sudan ndetse n’abarwanyi bo mu mutwe wa Rapid Support Forces (RSF) baritana ba mwana ku gitero cyagabwe ku bitaro kigahitana abantu 64 barimo abana 13, kikanakomeretsa abantu 89.
Dr.Tedros Adhanom Ghebreyesus, uyobora Ishami ry’Umuryango w’Abibumbye ryita ku Buzima (OMS) yavuze ko bibabaje ku kuba ibigo nderabuzima n’ibitaro bikomeje kwibasirwa n’ibitero mu ntambara yo muri Sudan.
Ni nyuma y’uko ku wa 20 Werurwe 2026, igitero cy’indege itagira abapilote cyibasiye ibitaro bya al-Daein biherereye muri Leta ya Darfur.
Ni igitero OMS yavuze ko cyaguyemo abantu 64, barimo abana 13, abandi bantu 89 bagakomereka ndetse kigasiga ibikorwa byose by’ibitaro bihagaze.
Abarwanyi ba RSF bagenzura igice cyabereyeno igitero bashinjije ingabo zaLeta ya Sudan kuba inyuma y’icyo gitero, mu gihe uruhande rwa Leta narwo rwavuze ko abarwanyi ba RSF bakomeje kwica abasivili banabiciye ahantu nko kwa muganga.
Dr. Tedros Adhanom Ghebreyesus yagaragaje ko mu ntambara imaze imyaka itatu ihanganishije Ingabo za Leta ya Sudan n’abarwanyi b’Umutwe wa Rapid Support Forces, ibitaro byibasiwe cyane ndetse hagapfirayo abantu 2, 036 mu bitero 213 byahibasiye.
Intambara muri Sudan yarubuye kuva muri Mata 2023, nyuma y’uko habayeho kutumvikana hagati y’Umugaba Mukuru w’Ingabo za Leta, Gen. Abdel-Fattah Burhan, n’uwahoze ari umwungiriza we Gen. Mohammed Hamdan Dagalo, uzwi cyane ku izina rya Hemedti, usigaye uyobora umutwe wa Rapid Support Forces.
Aba bagabo bombi bafatanyije mu guhirika ku butegetsi uwari Perezida Omar al-Bashir mu 2019, ndetse nyuma banakorana mu guhirika ubutegetsi bw’abasivili mu 2021.
Nyuma barashyamiranye bishingiye ku kukunanirwa gusaranganya ubutegetsi mu ngabo no mu nzego za gisivili.
Umuryango w’Abibumbye uvuga ko abantu barenga miliyoni 14 bavuye mu byabo, abandi barenga 40.000 bakicwa.
MUGIRANEZA THIERRY/ UMUSEKE.RW
