Umugaba w’Ingabo zirwanira ku butaka za Mozambique, Maj Gen André Rafael Mahunguane, uyu munsi yasuye icyicaro gikuru cy’Inzego z’Umutekano z’ u Rwanda i Mocímboa da Praia, mu Ntara ya Cabo Delgado.
Yakiriwe n’Umuyobozi w’Inzego z’Umutekano z’U Rwanda, Brig Gen CM Mujuni, ari kumwe n’Umuyobozi w’Ishami rya Polisi ndetse n’Umugaba wa Brigade ya Task Force Group-7.
Muri uru ruzinduko, Maj Gen Mahunguane yagejejweho amakuru ku miterere y’umutekano mu Ntara ya Cabo Delgado muri iki gihe.
Nyuma impande zombi zagiranye ibiganiro byibanze ku igenamigambi ry’ibikorwa bya gisirikare bihuriweho, gushimangira ubufatanye mu mikoranire y’ibikorwa no gusangira amakuru y’ingenzi.
Maj Gen Mahunguane yashimye imbaraga zikomeje gushyirwa hamwe n’ingabo za Mozambique n’iz’u Rwanda mu kurwanya iterabwoba.
Yakomeje ashimangira akamaro ko gukomeza ubufatanye hagati y’ingabo z’ibihugu byombi anizeza ko azatanga ubufasha bwe bwose.
U Rwanda rwohereje ingabo zo mu mutwe udasanzwe muri Mozambique nyuma y’ubwumvikane bw’ibihugu byombi mu gufatanya kurwanya imitwe y’iterabwoba yari yarayogoje Intara ya Cabo Delgado. Izi ngabo zatangiye koherezwa mu mwaka wa 2021.
IVOMO: MoD Website
UMUSEKE.RW
