Inzego zitandukanye z’Akarere ka Muhanga zabwiye abadepite ko hafashwe ingamba zo gukumira no guhashya amakimbirane yo mu Miryango.
Inzego zakoranye ibiganiro n’abagize Ihuriro ry’abanyarwandakazi bari mu nteko ishingamategeko(FFRP) n’izifite aho zihirurira n’ubuzima bw’Ingo.
Izo zirimo Ubuyobozi bw’Akarere, Abahagarariye amadini n’Amatorero, abagize Inama y’Igihugu y’abagore, iy’urubyiruko iy’abafite ubumuga, inzego z’Umutekano, ba Gitifu b’Imirenge, Njyanama na JDAF, Ubushinjacyaha, MAJ, Abahagarariye Urubyiruko n’abayobozi b’ibigo by’amashuri.
Umuyobozi w’Akarere ka Muhanga, Kayitare Jacqueline, yabwiye abadepite ko bari bafite imiryango 627 ibana mu makimbirane, akavuga ko 562 muri yo yigishijwe igafashwa kuyavamo, bingana na 89,6%.
Ati:”Amakimbirane yagaragaye muri iyo Miryango yatumye abana 77 bajya kwibera mu Mihanda bahunga ayo makimbirane”.
Akomeza avuga ko inyigisho zikomatanije bahaye imiryango irenga 500 zakurikiranywe n’abo bana 77 bari barahunze imiryango yabo; 70 muri bo bemeye gusubira mu miryango yabo, hakaba hasigaye abana 7 barimo kwigishwa.
Yabwiye abadepite ko muri iyo Miryango 627 basanze harimo Imiryango 420 yabanaga itarasezeranye mu buryo bwemewe n’amategeko kuko yarangwaga n’urwikekwe basezeranya 308.
Avuga ko basanze impamvu itera amakimbirane mu Miryango ari ukubana mu buryo bunyuranije n’amategeko no kutumvikana ku micungire y’umutungo.
Impamvu ya gatatu ni ugucana inyuma, ubuharike, ubusinzi bukabije, ndetse no guhoza ku nkeke.
Yongeye ati:”Ingamba twafashe ni ukubanza kumenya ikibazo buri Muryango ufite tukagisesengura kuko hari ibyo buri Muryango wihariye hakaba n’ibindi bahuriyeho bose”.
Kayitare avuga ko mu zindi ngamba bafashe zirimo gushaka Ingo zibanye neza zigaherekeza izibanye nabi kugeza zigeze ahantu heza.
Yavuze ko kwigisha Imiryango batabikora bonyine nk’Ubuyobozi bw’Akarere batabifashijwemo n’abafatanyabikorwa ndetse n’Inzego bakorana umunsi ku munsi.
Perezidanti wungirije w’Ihuriro ry’abafatanyabikorwa mu Iterambere ry’Akarere akaba na Pasteur uri mu kiruhuko cy’izabakuru kuri ubu Nyiraneza Albertine avuga ko mu nyigisho batanga zirimo kwibutsa abagiye kurushinga inshingano za buri wese.
Ati” Buriya amakimbirane hagati y’abashakanye aterwa nuko hari umwe uba atujuje neza inshingano ze”
Avuga ko kuzuza inshingano z’urugo zigomba guherekezwa no kubahiriza amabanga y’abashakanye umugabo ntiyime umugore ndetse n’umugore ntiyime umugabo.
Depite Munyangeyo Théogène yabwiye UMUSEKE ko akimbirane yo mu Miryango ajya kubaho hari ibimenyetso byayabanjirije.
Ati:”Ibibazo by’amakimbirane yo mu Muryango nibyo byaduhagurukije kuko iyo umuntu ashenye urugo aba ashenye Igihugu”.
Ku munsi wa mbere w’uruzinduko rw’abadepite bagiranye ibiganiro n’Inzego zitandukanye z’Akarere, bakoranye ibiganiro n’abanyeshuri bo mu bigo 2 byo mu Murenge wa Shyogwe n’uwa Nyamabuye.
Ku munsi wa kabiri bateganya kuganiriza Ingo zibanye nabi bakazifatanya n’abaturage mu kwizihiza Umunsi mpuzamahanga w’Umugore uzabera mu Murenge wa Shyogwe.
MUHIZI ELISÉE
UMUSEKE.RW i Muhanga.
