Leta zunze Ubumwe za Amerika n’ibihugu byo mu Burayi bavuze ko amakimbirane abera muri Repubulika Ihranaira Demokarasi ya Congo atazakemurwa n’uko impande zihanganye zakomeza gukoresha intambara n’imirwano, ko hakiwiriye kubahirizwa agahenge kari mu masezerano yasinywe.
Ni ibikubiye mu itangazo rihuriweho ryasohowe na Leta zunze Ubumwe za Amerika, Umuryango wunze Ubumwe w’u Burayi ndetse n’ibihugu byimbumbiye mu Muryango wa ICG ukurikiranira hafi ibibera mu karere k’Ibiyaga Bigari birimo u Bufaransa, u Bubiligi, u Budage, Danemark, u Busuwisi na Suède.
Itangazo ry’ibyo bihugu rivuga ko mu Burasirazuba bwa Congo hakomeje kubera ibikorwa byo kutubahiriza agahenge kemerejwe mu masezerano ya Washington yo ku wa 4 Ukuboza 2025, ndetse n’imyanzuro yafatiwe i Doha ku wa 19 Nyakanga 2025 igamije gushyiraho agahenge karambye no guhagarika imirwano burundu.
Ibyo bihugu bikurikiranira hafi ibibera mu karere k’Ibiyaga Bigari bivuga ko uko kutubahiriza ayo masezerano hakoreshwa indege za ‘drones’ mu bitero bya gisirikare, ibintu bishyira mu kaga gakomeye abaturage b’abasivili.
Biti “Impande zose zirebwa n’iki kibazo zigomba guhita zisubira ku cyemezo cyo guhagarika imirwano nta gushidikanya kandi zigakomeza ibiganiro by’amahoro. Nta gisubizo cya gisirikare gishobora kurangiza iyi ntambara.”
Ibi bihugu kandi byasabye impande bireba guhagarika kubiba urwango, ivangura n’ubugizi bwa nabi, bikorerwa abarimo abavuga Ikinyarwanda n’ibindi bikorwa bishyira abasivili mu kaga gakomeye, bikanasubiza ubumwe bwabo.
Biti “ICG irahamagarira impande zose kubahiriza inshingano zazo zo kubaha amategeko mpuzamahanga arengera abasivili mu gihe cy’intambara, no kwemeza ko ibikorwa by’ubutabazi byagezwa ku baturage babikeneye mu buryo bwuzuye, butekanye kandi butabangamiwe.”
Minisitiri w’Ububanyi n’Amahanga w’u Rwanda, Ambasaderi Olivier Nduhungirehe, yagaragaje ko itangazo rya ICG ritabogamye kuko rigaragaza ibikorwa bikomeje byo kwangiza agahenge by’umwihariko ibitero bya drones byibasira abasivili.
Ati “ Gusaba impande bireba kubahiriza ibyo bemeye mu maserano ya Washington na Doha bigomba gutangira hashyirwa mu bikorwa CONOPS [gahunda ihuriweho yo gusenya umutwe w’iterabwoba wa FDLR no gukuraho ingamba z’ubwirinziyemerejwe mu biganiro bya Luanda tariki ya 31 Ukwakira 2024]”
Mu butumwa bwo kuri X, Minisitiri Nduhungirehe yavuze ko ibyagaragajwe birimo ibiganiro bihuza Abanye-Congo ndetse no guhagarika imvugo z’urwango zibasira Abanye-Congo b’Abatutsi, ari impamvu zumvikana zahoze zisabwa kuva mu mezi yatambutse.
Ku kibuga mu Burasirazuba bwa Congo, imirwano irakomeje ahanini hifashishwa indege zitagira abadereva zo mu bwoko bwa drones harimo niziherutse gukoreshwa n’ingabo za Congo mu bitero byahitanye Lt. Col Willy Ngoma wavugiraga umutwe wa AFC/M23.
MUGIRANEZA THIERRY/ UMUSEKE.RW
