Rayon na Police zikomeje gukubana! Ibyaranze umunsi wa 16 muri Shampiyona y’Abagore

Mu gihe hakinwaga imikino y’umusi wa 16 muri Shampiyona y’Abagore y’u Rwanda y’umupira w’amaguru [Rwanda Women’s Super League], Rayon Sports WFC na Police WFC ziyiyoboye, zabonye amanota yuzuye.

Ku Cyumweru, tariki ya 15 Gashyantare 2026, ni bwo habaye imikino isoza iy’umunsi wa 16 muri Shampiyona y’Abagore y’u Rwanda y’umupira w’amaguru [Rwanda Women’s Super League].

Rayon Sports WFC yari yagiye mu Karere ka Nyamasheke, yahakuye amanota yuzuye ku ntsinzi y’ibitego 2-0 yatsinze Macuba WFC yari ku kibuga cya yo.

Murera yatsindiwe na Niyonshuti Emerance watsinze igitego cya kabiri ku munota wa 81, na Andersène wari wagitsinze ku munota wa 34. Iyi ntsinzi yatumye Gikundiro ikomeza kuyobora Shampiyona n’amanota 39.

Indi kipe yabonye intsinzi, ni Police WFC yatsinze Bugesera WFC ibitego 4-1, ikomeza kotsa igitutu Murera. Iyi kipe na yo yagize amanota 39 ariko ikomeza kurushwa ibitego 13.

Mu gihe izihanganiye ibikombe zabonaga amanota yuzuye, mu zihanganiye kutajya mu cyiciro cya kabiri, habayeho impinduka nyuma y’itsindwa rya AS Kigali WFC yatsinzwe na APR WFC igitego 1-0 mu mukino wabereye kuri Kigali Pelé Stadium.

Forever WFC yanganyije na Muhazi WFC igitego 1-1, yahise ifata umwanya wa 10 n’amanota 11 inganya n’ikipe iterwa inkunga n’Umujyi wa Kigali ariko zigatandukanywa n’umwenda w’ibitego zatsinzwe.

Undi mukino wabaye, ni uwo Kamonyi WFC yatsinzwemo na Indahangarwa WFC igitego 1-0 mu mukino wabereye kuri Stade yok u Ruyenzi.

Imikino y’umunsi wa 16 muri iyi Shampiyona, yasize Nyagatare WFC igumye ku mwanya wa nyuma n’ubusa bw’amanota mu gihe AS Kigali WFC yagiye ku mwanya wa 11 n’amanota 11 n’umwenda w’ibitego 22.

UMUSEKE.RW