Perezida Évariste Ndayishimiye, w’u Burundi yatangiye kuyobora Umuryango wa Afurika Yunze Ubumwe (AU), mu gihe cy’umwaka umwe, inshingano asimbuyeho João Lourenço wa Angola.
Ni inshingano yaherewe i Addis Ababa muri Ethiopia, kuri uyu wa Gatandatu tariki ya 14 Gashyantare 2026, mu Nama ya 39 isanzwe y’Abakuru b’Ibihugu na za Guverinoma zigize Umuryango wa Afurika Yunze Ubumwe.
Ndayishimiye ukunze kwiyita General Neva niwe mutegetsi wa mbere mu bayoboye u Burundi uhawe inshingano zo kuyobora Umuryango wa Afurika Yunze Ubumwe (AU).
Muri manda y’umwaka umwe, u Burundi buzungurizwa na Ghana nka Visi Perezida wa mbere mu gihe Tanzania izaba ari Visi Perezida wa kabiri.
Mu ijambo aha ikaze Ndayishimiye, Perezida João Manuel Gonçalves Lourenço yabwiye bagenzi be bari bateraniye mu nyubako ikoreramo icyicaro cya AU, ko itorwa rya Ndayishimiye ryabaye ku bwumvikane busesuye “bigaragaza ukwemera dusangiye ko, mu mezi cumi n’abiri ari imbere. Umuryango wa Afurika Yunze Ubumwe uzayoborwa n’umunyapolitiki w’inararibonye ufite indangagaciro n’imico myiza nk’iyawe.”
Ati “Ibi biduha icyizere gihamye ko muzaharanira kurinda no guteza imbere inyungu n’intego dusangiye, mwifashishije ubwenge n’ubupfura bibaranga.”
Yavuze ko kandi intego ze zikwiriye kuyoborwa n’amahame y’ubumwe, ubufatanye, amahoro, ituze n’iterambere.
Ndayishimiye we yavuze ko yahawe inshingano ziremereye atatekerezaga.
Ati ” Nagize ibyiyumviro, nibaza nti ‘Ndi nde wo kuyobora Afurika yose mu cyerekezo mu gihe cy’umwaka?’ Kubera Imana impa imbaraga, nzabishobora kubera ko ntitoranya abakomeye ahubwo ikomeza abo yatoranyije.”
Perezida wa Komisiyo y’Umuryango wa Afurika Yunze Ubumwe, Mahmoud Ali Youssouf, we yavuze ko uyu mwaka uyu mugabane urajwe inshinga no gukwirakwiza amazi meza ndetse no kwimakaza isuku n’isukura mu baturage ba Afurika.
Nka Perezida w’Umuryango wa Afurika Yunze Ubumwe, ibibazo by’umutekano muri Afurika kuva mu gace ka Sahel kugera mu Burasirazuba bwa Repubulika Iharanira Demokarasi ya Congo ni bimwe mu bizaba bitegereje Perezida Ndayishimiye.
Mu bibera muri Congo, amahanga ategereje kuzareba uko u Burundi nk’ubuzaba buyoboye Umuryango buzitwara mu guhuza impande zihanganye dore ko u Burundi busanganywe ingabo nyinshi muri Repubulika Iharanira Demokarasi ya Congo zagiye gufasha Kinshasa guhangana na AFC/M23.
Niba u Burundi buzajya hagati nk’umuhuza mu biganiro byose biba cyangwa niba buzaguma ku ruhande rwa Repubulika Iharanira Demokarasi ya Congo.
MUGIRANEZA THIERRY/ UMUSEKE.RW
