Shema Arnaud De Bosher uzwi nka DJ TOXXYK, Urukiko Rwisumbuye rwa Nyarugenge rwatesheje agaciro ubujurire yatanze.
Ku isaha ya saa cyenda n’iminota 05 kuri uyu wa Mbere tariki 09 Gashyantare, 2026 nibwo Umucamanza yinjiye mu cyumba cy’urukiko, cyahawe No1 atangira gusoma icyemezo cy’urukiko mu rubanza rw’ubujurire ku ifunga n’ifungurwa by’agateganyo, ku kirego cyatanzwe na Shema Arnound De Bosher.
Shema Arnaud uzwi nka DJ TOXXYK acyekwaho icyaha cyo kwica umuntu atabigambiriye, icyo gukoresha ibiyobyabwenge n’icyo kwanga gupimwa ibisindisha.
Yabwiye Urukiko ko yakoze impanuka, ariko atari yayigambiriye kwica.
TOXXYK yabwiye Urukiko ko n’ibiyobyabwenge byavuzwe ko byafatiwe iwe, ntacyabyemeza kuko nta Laboratoire yabyemeje ko ari ibiyobyabwenge.
Mu cyemezo cyasomwe, Umucamanza yavuze ko DJ TOXXYK akomeza gukurikiranwa afunzwe kuko na we yemereye Urukiko ko yakoze impanuka ikagwamo umupolisi wari mu kazi.
Umucamanza yavuze ko haburanwaga kurekurwa by’agateganyo, hataburanwe urubanza mu mizi, bityo ko Urukiko rutasuzuma ikibazo cy’ibiyobyabwenge.
Urukiko rwemeje ko TOXXYK akomeza gufungwa by’agateganyo, naho kuba yarahawe imbabazi n’umuryango wa nyakwigendera Mushabe Fred bizamugirira umumaro mu kuburana urubanza mu mizi.
TOXXYK ukomeza gufungwa iminsi 30 by’agateganyo yari yatanze ingwate, izo na zo ntabwo zahawe agaciro.
Tariki 20 Ukuboza, 2025 nibwo uriya musore yagonze umupilisi wari mu kazi ahitwa Payage muri Kigali, ahita apfa. Nyuma yaje gufatwa, ndetse tariki 14/01/2026 nibwo yatangiye kuburana mu rukiko rw’ibanze rwa Nyarugenge, aho yaregwaga ibyaha bine.
Tariki 21/01/2026 urukiko rw’Ibanze rwategetse ko afungwa by’agateganyo, nyuma yo gusanga hari impamvu zigaragara zo kumufunga, agakurikiranwa afunze.
Nyuma nibwo yaje gutanga ikirego cyo kujurira asaba gufungurwa agakurikiranwa ari hanze.
NKUNDINEZA Jean Paul / UMUSEKE.RW
