Mu gihe habura amasaha abarirwa ku ntoki ngo Igikombe cya Afurika 2025 gitangire, Ishyirahamwe ry’Umupira w’Amaguru mu Rwanda, FERWAFA, ryatangaje ko Abanyarwanda Batandatu barimo Uwayezu Jean François Regis, bahawe inshingano muri iri rushanwa.
Kuri iki Cyumweru, tariki ya 21 Ukuboza 2025 kugeza ku wa 18 Mutarama 2026, mu gihugu cya Maroc hazaba hari kubera irushanwa ry’Igikombe cya Afurika 2025. Iri rushanwa rizaba ririmo Abanyarwanda Batandatu bahawe inshingano zitandukanye.
Abanyarwanda bafite imirimo muri iri rushanwa, barimo umusifuzi mpuzamahanga, Uwikunda Samuel uri mu basifuzi 73 batoranyijwe n’Impuzamashyirahamwe y’Umupira w’Amaguru muri Afurika, CAF. Aba barimo 28 bazaba bari mu kibuga hagati, 31 bo ku ruhande na 14 bazaba bakoresha Ikoranabuhanga ry’amashusho ryunganira abasifuzi [VAR].
Abandi bazaba bafite akazi muri iri rushanwa, ni Umuyobozi Mukuru wa Rwanda Premier League, Karangwa Jules, uzaba ari Umuhuzabikorwa Mukuru kuri Stade Olympique iri mu mujyi wa Rabat.
Hari kandi Uwayezu Jean François Regis uzaba ari Umuhuzabikorwa wungirije kuri El Barid Stadium na yo iherereye mu Mujyi wa Rabat. Hakaba Hadidja Kayishakire uzaba ashinzwe ibikorwa byo kwakira abashyitsi ku kibuga cya Complex Sportif Moulay Abdelah.
Iki ni cyo kibuga kiza gukinirwaho umukino wo gufungura irushanwa uteganyijwe kuri iki Cyumweru.
Undi wahawe inshingano, ni Isaro Soni usanzwe Umuyobozi usanzwe ushinzwe ibikorwa muri FERWAFA. Uyu nawe azaba ashinzwe ibikorwa byo kwakira abashyitsi ku kibuga cya Grand Stade de Marrakech.
Undi Munyarwanda uri mu bahawe inshingano kugira ngo Igikombe cya Afurika kizaba kiri kuba ku nshuro ya 53 kigende neza, ni Mpambara Aloys uzaba ushinzwe ibikorwa byo kwita ku kibuga kuri Tangier Grand Stadium.
Iri rushanwa ryitabiriwe n’Ibihugu 24 byashyizwe mu matsinda atandatu ni byo bizahanganira Igikombe cya Afurika cya 2025. Ibi birimo na Côte d’Ivoire iheruka kwegukana icyabereye iwayo cya 2023.
Misiri ni yo ibitse ibikombe byinshi by’iri rushanwa [7], igakurikirwa na Cameroun ibitse bitanu na Côte ibitse bine.
UMUSEKE.RW