Mu mukino w’umunsi wa Gatanu wa shampiyona, ikipe ya Rayon Sports WFC yari mu gipangu cya yo cyo mu Nzove, yatsinze Macuba WFC ibitego 3-0.
Kuri iki Cyumweru, tariki y 16 Ugushyingo 2025, ni bwo habaye imikino isoza umunsi wa Gatanu wa shampiyona y’Abagore y’Icyiciro cya Mbere y’Umupira w’Amaguru.
Rayon Sports WFC yari yatsinzwe na Kamonyi WFC mu mukino uheruka w’umusi wa Kane wa shampiyona, nta kosa yigeze ikorera ku kibuga cya yo cyo mu Nzove. Ibifashijwemo na Ukwinkunda Jeannette ‘Jiji’ watsinze ibitego bibiri birimo kimwe cya penaliti na Emelyne watsinze kimwe, yatsinze Macuba WFC y’i Nyamasheke ibitego 3-0.
Rwaka Claude utoza Gikundiro, yari yahinduye ba myugariro be, akuramo kapiteni, Uwimbabazi Immaculée wari wasimbuwe na Josiane wagize umukino mwiza. Macuba WFC iri gukina umwaka wa yo wa mbere mu Cyiciro cya Mbere, imaze gutsindwa ibitego bitandatu mu mikino ibiri iheruka gukina nyuma yo gutsindirwa na Police WFC ku kibuga cya yo ibitego 3-0 mu mukino w’umunsi wa Kane wa shampiyona.
Undi mukino wabaye uyu munsi, ni uwo Police WFC yatsinzemo Bugesera WFC ibitego 2-1.
Uko indi mikino yagenze:
- Muhazi United WFC 0-1 Forever WFC
- Inyemera WFC 3-0 Nyagatare WFC
- APR WFC 1-1 AS Kigali WFC
- Indahangarwa WFC 0-0 Kamonyi WFC
Ikipe y’Abashinzwe Umutekano, ni yo iyoboye urutonde rwa shampiyona n’amanota 15 mu mikino imaze gukinwa. Bivuze ko ari yo itaratakaza umukino n’umwe.
UMUSEKE.RW