Umunya-Maroc ukinira ikipe y’Igihugu y’iwabo, Hakim Ziyech wakiniye amakipe arimo Chelsea yo mu Bwongereza, yerekeje muri Wydad Casablanca y’iwabo muri Maroc.
Aya makuru yagarutsweho n’ibitangazamakuru bitandukanye ndetse n’abanyamakuru bakomeye i Burayi, barimo Fabrizio Romano uzwiho gutangaza amakuru y’abakinnyi y’igura n’igurisha.
Uyu munyamakuru, yavuze ko Ziyech w’imyaka 32, yamaze kwemeranya byose na Wyada Athletic Club igisgaye ari ukumutangaza nk’umukinnyi w’iyi kipe mushya.
Hakim ukomoka ku babyeyi bakomoka muri Maroc, yavukiye mu Buholande, yakiniye amakipe mato y’iki gihugu mbere y’uko yemera gukinira ikipe y’igihugu ya Maroc.
Mu makipe y’abato, uyu musore ukina aca ku ruhande mu gice cy’ubusatirizi, yakiniye amakipe arimo Reaal Dronten, ASV Dronten na Heerenceen zose zo mu Buholande.
Ubwo yari azamutse, mu makipe y’abakuru yakiniye mu Buholande, harimo Heerenveen ya Kabiri, Heerenveen ya mbere, FC Twente na Ajax yakiniye mbere yo kujya muri Chelsea yo mu bwongereza yakiniye hagati ya 2020-2023.
Yaje kuva mu Bwongereza mu 2023, ajya muri Galatasalay yo muri Turquie. Yahavuye yerekeza muri Al-Duhail yo muri Qatar. Nyuma yo kuyisozamo amasezerano, ubu nta kipe yari afite.
UMUSEKE.RW