Ubuyobozi bw’Akarere ka Muhanga buvuga ko burimo gushakisha Rwiyemezamirimo washora miliyari eshanu z’uRwanda, akegukana ubutaka bw’aho igororero rya Muhanga riherereye.
Ibi Umuyobozi w’Akarere ka Muhanga Kayitare Jacqueline, yabivuze mu Imurikabikorwa ry’Abikorera bo muri aka Karere ryabahuje na Minisitiri w’Ubucuruzi n’Inganda Dr Ngabitsinze Jean Chrysostome.
Mayor Kayitare avuga ko bagendeye ku gishushanyombonera cy’umujyi wa Muhanga,kigaragaza ko aho igororero ryubatse hagenewe ibikorwa by’ubucuruzi birimo inyubako zigezweho zigendanye n’icyerekezo bifuza kuganishamo Akarere.
Ati “Tumaze igihe dushakisha Umushoramari watanga miliyari 5 noneho akabyaza Umusaruro buriya butaka uzatanga ayo mafaranga ntabwo araboneka.”
Kayitare avuga ko barimo gushishikariza abikorera kubaka ibibanza bitubatse biri mu Mujyi wa Muhanga.
Ati “Kubona ubutaka bungana n’ubwo Igororero rikoreraho bisaba izo miliyari eshanu.”
Uyu Muyobozi avuga ko bateye intambwe baganiriza bamwe mu bafatanyabikorwa barimo Diyosezi ya Kabgayi,ariko bikaba bitarakunze kubera ko ubwo bushobozi bukenewe batarabubona.
Yavuze ko ari Umushinga munini bukenewe ayo mikoro ari kuri urwo rwego.
Perezida wa PSF mu Karere ka Muhanga, Kimonyo Juvénal avuga ko hari ibibanza byinshi abikorera babanje kubaka, ubu akavuga ko hari abashoramari bafite ubushobozi bwisumbuyeho batangiye gusura bimwe mu bibanza bya leta biherereye mu mujyi wa Muhanga.
Ati “Dufite Umushoramari urimo kurambagiza ikibanza cyahoze ari icya RSSB’
Minisitiri w’Ubucuruzi n’Inganda Dr Ngabitsinze Jean Chrysostome avuga ko hari icyizere bafite ko abikorera bazakora impinduka igaragaza isura nziza y’Umujyi wa Muhanga bashingiye ku ishoramari ryo mu cyanya cy’inganda bashoyemo.”
Minisitiri Ngabitsinze avuga ko ubutaka bwa leta bugomba kubyazwa Umusaruro bugahabwa abafite amafaranga menshi yo kubyubaka.
Ati “Akarere gafite inshingano yo kuranga ubutaka bwa Leta bukeneye kubyaza Umusaruro.”
Ubuyobozi bw’Akarere ka Muhanga buvuga ko hashize imyaka itatu bwarakoze inyigo igaragaza amafaranga akenewe ngo Igororero rya Muhanga ryimurirwe ahandi.
Igororero rya Muhanga rifite ubuso bwa hegitari eshanu.
MUHIZI ELISÉE
UMUSEKE.RW/Muhanga.
NDUMVA AKARERE kakora projet yo kwimura GEREZA, nkuko NYARUGENGE yabikoze. Buriya ikibazo, ni uko haba harimo gushaka kwirukansa ibintu. Umushinga muhe igihe kiri hagati y’imyaka 3 ni 5; Buri mwaka muteganye ingengo y’imari ihwanye na Miliyari 1 500 000 000 Frw. Mutangire mwubake. Ntabwo nzi iyo gereza yatwara amafaranga angahe, ariko kuko akenshi aba ari ama SALLE, cg Dortoir, miliyari 7 hari aho zageza inyubako kuburyo ABAGORORWA bayimukiramo. Na NYARUGENGE yagiye MAGERAGERE hakikiri ibibura. HANYUMA rero, n’imara kwimuka, mufate izi ha 5, mukate ibibanza bifatika bitewe n’igishushanyo mbonera. Muce imishanda, mushyireho amatara. Ahasigaye mu gurishe abashoramari; Ndakubwiza ukuri, icya make cyaba 150 000 000; HAVUYEMO IBIBANZA 60, (ahandi mpashyire imihanda n’ibindi bikorwa remezo), havamo miliyari 9. Yego yaza buhoro buhoro, ariko AMAHEREZO akazagerwaho.